اسلام آباد میں غیر قانونی نیوی کلب کو نوٹس

پاکستان کے وفاقی دارالحکومت اسلام آباد کے ترقیاتی ادارے سی ڈی اے نے بحری فوج کی جانب سے شہر کے راول ڈیم کے کنارے بنائے گئے غیر قانونی کلب کو گرانے کا نوٹس جاری کیا ہے۔

سی ڈی اے نے 13 جولائی کو نیوی سیلنگ کلب کو جاری کیے گئے نوٹس میں گزشتہ دو نوٹسز کا بھی حوالہ دیا ہے جن میں ڈیم کے علاقے میں غیر قانونی تعمیرات روکنے کا انتباہ جاری کیا تھا۔

پہلا نوٹس ستمبر 2019 جبکہ دوسرا نوٹس رواں سال فروری میں جاری کیا گیا تھا۔

واضح رہے کہ پاکستان کی سپریم کورٹ راول ڈیم کے کنارے تفریحی سرگرمیوں اور تعمیرات پر پابندی عائد کر چکی ہے۔

ڈیم کا پانی شہریوں کو پینے کے لیے فراہم کیا جاتا ہے۔

بحری فوج کی جانب سے سی ڈی اے کے پہلے دو نوٹس کے باوجود تعمیرات جاری رکھی گئیں اور ڈیم کے کنارے کلب کا افتتاح گزشتہ ہفتے نیوی کے اعلی حکام نے کیا تھا جس میں فوجی افسران کی ممبرشپ دس ہزار جبکہ سویلین کے لیے ڈیڑھ لاکھ سے چھ لاکھ تک تھی۔