جنرل باجوہ کی اٹلی کو وائرس کے خلاف مدد کی پیشکش

پاکستان کی فوج کے سربراہ جنرل قمر جاوید باجوہ نے کورونا سے متاثرہ یورپی ملک اٹلی کو مدد اور تعاون کی پیش کش کی ہے۔

فوج کے شعبہ تعلقات عامہ آئی ایس پی آر سے جاری کیے گئے بیان کے مطابق آرمی چیف نے اٹلی کے سفیر کو کورونا کے خلاف ہر ممکن تعاون کی پیشکش کی۔

آئی ایس پی آر کے بیان میں کہا گیا کہ آرمی چیف جنرل قمر جاوید باجوہ سےاٹلی کےسفیر ایندریاس فیراریسی نے راولپنڈی میں ملاقات کی۔

ملاقات میں باہمی دلچسپی کے امور ، خطے کی صورتحال اور دوطرفہ تعاون پر تبادلہ خیال کیا گیا۔

بیان کے مطابق اٹلی کے سفیر نے خطے میں امن کی کوششوں پر پاکستان کے کردار کو سراہا۔

واضح رہے کہ گزشتہ روز عراق کے سفیر نے بھی جنرل باجوہ سے ملاقات کی تھی جس میں پاکستان کی فوج کے سربراہ نے سکیورٹی اور معیشت سمیت دیگر شعبوں میں تعاون کی پیش کش کی تھی۔