اسرائیل کو تسلیم کرنے کا کوئی امکان نہیں: پاکستان
پاکستان نے کہا ہے کہ اس کی جانب سے اسرائیل کو تسلیم کیے جانے کا کوئی امکان نہیں۔
منگل کو پاکستان کے دفترخارجہ کے ترجمان زاہد حفیظ نے بتایا کہ پاکستان کے اسرائیل کو تسلیم کیے جانے کے حوالے سے بے بنیاد افواہوں کو قطعی طور پر مسترد کرتے ہیں۔
زاہد حفیظ چوہدری نے کہا ہے کہ وزیر اعظم عمران خان کے بیانات اس حوالے سے بالکل واضح ہیں کہ جب تک مسئلہ فلسطین کا فلسطینی عوام کے لیے قابل قبول حل نہیں نکل آتا پاکستان اسرائیل کو تسلیم نہیں کر سکتا۔
بیان کے مطابق پاکستان واضح طور پر فلسطینی عوام کے ناقابل تنسیخ حق استصواب رائے کی حمایت کرتا ہے۔
زاہد حفیظ چوہدری نے مزید وضاحت کی کہ ایک منصفانہ اور دیرپا امن کے لیے اقوام متحدہ، او آئی سی قراردادوں کے مطابق فلسطین کادو ریاستی حل ضروری ہے ایک ایسا حل جو کہ 1967 کی سرحدوں سے پہلے کے مطابق ہو اور جس میں القدس فلسطین کا دارالحکومت ہو۔
