امریکہ میں بائیڈن انتظامیہ کی جانب سے منظرِ عام پر لائی جانے والی انٹیلیجنس رپورٹ میں دعویٰ کیا گیا ہے کہ ولی عہد شہزادہ محمد بن سلمان نے سعودی نژاد امریکی صحافی جمال خاشقجی کو زندہ یا مردہ پکڑنے کے منصوبے کی منظوری دی تھی۔

صحافی خاشقجی کے قتل میں امریکہ نے پہلی مرتبہ سعودی حکمران کا کھلے عام نام لیا ہے جبکہ محمد بن سلمان اس الزام سے انکار کرتے آئے ہیں کہ انھوں نے قتل کے احکامات جاری کیے تھے۔

ادھر سعودی وزارت خارجہ نے امریکی انٹیلیجنس رپورٹ کو یکسر مسترد کرتے ہوئے اسے سعودی قیادت کے خلاف ’جارحانہ اور غلط‘ قرار دیا ہے۔

مملکت نے کہا ہے کہ وہ اس رپورٹ کو تسلیم نہیں کرتے۔

سعودی وزارت خارجہ نے بیان میں کہا ہے کہ اس رپورٹ میں غلط معلومات کا ایک مجموعہ اور جھوٹے نتائج شامل ہیں۔ کسی بھی ایسے معاملے کو مسترد کرتے ہیں جو ملک کی قیادت، خود مختاری اور اس کی عدلیہ کی آزادی کے لیے تعصب کا باعث بنے۔