”زرداری اور نواز شریف کے پلان کا مقابلہ ممکن نہیں“

Reading Time: 2 minutes

پاکستان پیپلز پارٹی کے چیئرمین بلاول بھٹو زرداری نے کہا ہے کہ پی ڈی ایم نے سیاسی کارڈ کھیل کر بتا دیا کہ یہ حکومت کتنی کمزور اور نازک ہے۔

سنیچر کو اسلام آباد میں پاکستان ڈیموکریٹک موومنٹ کے ظہرانے کے دوران خطاب میں بلاول بھٹو کا کہنا تھا کہ ’لوگوں کو ہمارے اندر اتفاق نظر آ رہا ہے۔ ہم جمہوریت کے ذریعے اگے بڑھ رہے ہیں۔‘

انہوں نے کہا کہ ’ایک سینیٹ کی سیٹ نے ساری کٹھ پتلیوں کا پول کھول دیا۔ ہم نے دکھا دیا ہے کہ عمران خان نے اعتماد کھو دیا ہے۔ پارلیمان کا اعتماد بھی کھو دیا اور عوام کا بھی۔‘

ان کا کہنا تھا کہ ’صدر پاکستان نے خود مان لیا کہ عمران اکثریت کھو چکے ہیں۔ آپ یہ اس طرح سے ثابت نہیں کرتے کہ آپ کے پاس سپورٹ ہے۔‘

بلاول بھٹو نے کہا کہ ’سیاست بھی ایک فن ہے جو ناممکن کو ممکن بنا دیتی ہے۔‘

پیپلز پارٹی کے چیئرمین نے کہا کہ ’اب یہ فیصلہ کہ کب، کہاں اور کس کے خلاف عدم اعتماد ہو گا یہ پی ڈی ایم کرے گی۔ ہم حکمت عملی سامنے لے کر ائیں گے۔ ہم بتائیں گے آپ کب تک کرسی پر بیٹھیں گے۔ سپیکر اسمبلی کب تک کرسی پر بیٹھیں گے۔‘

بلاول نے کہا کہ ’پی ڈی ایم اسی اتفاق کے ساتھ کام کرے گی۔ جب مولانا فضل الرحمٰن، آصف زرداری اور نواز شریف پلان بناتے ہیں تو اس کا کوئی مقابلہ نہیں کر سکتا۔‘

ان کا کہنا تھا کہ ’امید کرتا ہوں اگر ہم سب مل کر محنت کریں، ایک ہو کر آگے بڑھیں تو کامیابی ہماری ہوگی۔ یہ ہر پاکستانی کی کامیابی ہوگی۔‘

قبل ازیں مسلم لیگ ن کی نائب صدر مریم نواز کا کہنا تھا کہ ’آج عمران خان نے اعتماد کا جھوٹا ووٹ لے لیا ہے۔ آج آپ نے انہی سے ووٹ لیا جن کے بارے میں کہتے تھے بک گئے ہیں۔‘

انہوں نے کہا کہ ’عوام کے سامنے دودھ کا دودھ، پانی کا ہانی ہو گیا ہے۔ کوئی بات چھپی نہیں رہی۔ کہاں سے فون آئے، کہاں سے دباؤ ڈالا گیا۔ اب وہ دور گیا جب آپ دھونس جماتے تھے اور دیوار کے پیچھے چھپ جاتے تھے۔ اب ایسا نہیں ہوگا۔‘