پاکستان سے سائبر سکیورٹی کا معاہدہ کرنے میں16 ممالک کی دلچسپی:حکومت
Reading Time: < 1 minuteپاکستان میں حکومت نے دعویٰ کیا ہے کہ 16 ممالک نے سائبر سکیورٹی معاہدہ کرنے میں دلچسپی ظاہر کی ہے۔
جمعرات کو قومی اسمبلی کی قائمہ کمیٹی برائے دفاع کے اجلاس میں وزارت داخلہ کے ایڈیشنل سیکریٹری نے بتایا کہ ’سائبر سکیورٹی کا باہمی قانونی معاونت کا قانون پاس ہوگیا ہے جس کے تحت اب دیگر ممالک سے معاہدے کیے جا سکیں گے۔‘
پارلیمنٹ ہاؤس میں امجد علی خان کی زیر صدارت ہونے والے اجلاس میں ڈائریکٹر سائبر کرائم نے بتایا کہ ’16 ممالک نے پاکستان سے سائبر سکیورٹی کے حوالے سے معاہدے کرنے میں دلچسپی ظاہر کی ہے۔‘
ڈائریکٹر سائبر کرائم کے مطابق ’جن 16 ممالک نے سائبر سکیورٹی کے حوالے سے معاہدوں میں دلچسپی ظاہر کی ہے ان میں سعودی عرب اور انڈیا بھی شامل ہیں۔‘
ڈائریکٹر سائبر کرائم بابر بخت قریشی نے بتایا کہ ’سائبر کرائم کے قانون کے بارے میں مقامی عدالتوں کے ججز کو بھی پتا نہیں ہوتا، سائبر کرائم کے حوالے سے ججز کی تربیت ہونی چاہیے۔‘
وزارت دفاع کے حکام نے کمیٹی کو بتایا کہ ’سائبر کرائم کے معاملے میں صرف ایف آئی اے پر تکیہ کرنا مناسب نہیں ہو گا۔‘
تحریک انصاف کے رکن قومی اسمبلی طاہر صادق نے کہا کہ ’سائبر کرائم سے متعلق مقدمات میں ججز لگانے سے پہلے ان کی ٹریننگ ہونی چاہیے‘ جبکہ برجیس طاہر نے تجویز دی کہ ’سائبر کرائم کے مقدمات کے لیے الگ عدالتیں بنائی جائیں۔‘
پی ٹی اے حکام نے کمیٹی کو بتایا کہ ’سائبر کرائم کے معاملات کو دیکھنے کے لیے سائبر سکیورٹی اتھارٹی بنائی جارہی ہے، جس میں اتھارٹی نیشنل سکیورٹی ایجنسی سے منسلک ہوگی تاکہ ہم سائبر وار کے لیے تیار رہیں۔‘
