غیرت کے نام پر بھائیوں نے بہن کو ڈنڈے مار کر قتل کر دیا

راولپنڈی کے علاقے اڈیالہ روڈ پر خاتون کو ڈنڈے مار کر قتل کرنے اور لاش بھینسوں کے باڑے میں پھینکنے کی تفتیش میں پولیس نے اہم پیش رفت کرتے ہوئے ملزم کو گرفتار کر لیا ہے۔

پولیس کے مطابق مقتولہ کو بھائی بابر شاہ نے غیرت کے نام پر قتل کیا۔

پولیس نے قتل میں استعمال ہونے والا ڈنڈا بھی برآمد کر لیا ہے۔
پولیس کے مطابق ایف آئی آر مقتولہ کے بھائی ابرار شاہ کی مدعیت میں درج تھی۔
پولیس نے بتایا کہ وقوعہ کے حقائق چھپانے، شواہد مٹانے پر مدعی سمیت مقتولہ کے تیسرے بھائی صداقت کو بھی گرفتار کر لیا گیا ہے۔

پولیس کے مطابق مقتولہ کی والدہ بھی حقائق چھپانے میں شامل تھیں، بیماری کے باعث فی الوقت مقتولہ کی ماں کو گرفتار نہیں کیا گیا۔

پولیس نے قتل کے مقدمے میں حقائق چھپانے اور ثبوت مٹانے کی دفعات بھی شامل کر لی ہیں۔