افغانستان میں لڑکیوں کے سکول کھولنے کے چند گھنٹے بعد بند

افغانستان کا کنٹرول رکھنے والے طالبان نے ملک میں لڑکیوں کے سیکنڈری سکول کھولے جانے کا حکم چند گھنٹے بعد واپس لے لیا ہے۔

خبر رساں ادارے اے ایف پی کے مطابق لڑکیوں کے سیکنڈری سکول کھولے جانے کے چند گھنٹے بعد پھر سے بند کرنے اور طالبات کو گھر لوٹ جانے کا حکم دیا ہے، جس پر طالبات میں مایوسی کی لہر دوڑ گئی ہے۔

طالبان کے ترجمان انعام اللہ ثمنگنی نے اقدام کی تصدیق کرتے ہوئے کہا ہے کہ ’ہاں یہ درست ہے۔‘

ترجمان نے اچانک سکولوں کو بند کرنے کے اقدام کی وجہ نہیں بتائی جبکہ دوسری جانب وزارت تعلیم کے ترجمان عزیز احمد کہنا ہے کہ انہیں اس معاملے پر بات کرنے سے منع کیا گیا ہے۔