وزیراعظم کا شہباز گل کی گاڑی کے حادثے کی تحقیقات کا حکم

وزیراعظم شہباز شریف نے موٹر وے پر تحریک انصاف کے رہنما شہبازگل کو پیش آنے والے حادثے کی تحقیقات کا حکم دیا ہے.

جمعرات کو وزیراعظم ہاؤس سے جاری بیان کے مطابق شہبازگل کی گاڑی کو موٹر وے پر پیش آنے والے حادثے کا وزیراعظم نے نوٹس لیا اور پولیس کو تحقیقات کا حکم دیا۔

بیان کے مطابق وزیراعظم نے ہدایت کی کہ انصاف کے تمام تقاضے پورے کیے جائیں۔

خیال رہے کہ سابق وزیراعظم عمران خان کے چیف آف سٹاف شہباز گل کی گاڑی موٹر وے پر حادثے کا شکار ہوئی تھی۔

موٹر وے پولیس کے مطابق شہباز گل نے بیان دیا کہ ان کی گاڑی کو پیچھے سے آنے والی تیز رفتار کار نے ٹکر ماری۔

حادثے میں شہباز گل معمولی زخمی ہوئے جن کو طبی امداد دی گئی.

اطلاعات کے مطابق شہباز گل اسلام آباد سے لاہور جا رہے تھے جب سالم انٹرچینچ کے قریب حادثہ پیش آیا.

وہ دو روز قبل ہی امریکہ سے واپس آئے تھے.

موٹروے حکام کے مطابق ڈاکٹر شہباز گل سمیت گاڑی میں تین افراد سوار تھے، حادثے میں تینوں افراد محفوظ رہے تاہم معمولی چوٹیں آئیں.