ڈنمارک کے شاپنگ مال میں نوجوان کی فائرنگ، تین افراد ہلاک

Reading Time: < 1 minute

ڈنمارک کے دارالحکومت کوپن ہیگن کے ایک شاپنگ مال میں اتوار کو فائرنگ سے تین افراد ہلاک جبکہ تین شدید زخمی ہوگئے ہیں۔

خبر رساں ایجنسی ایسوسی ایٹڈ پریس نے ڈینش پولیس کے انسپکٹر سورن تھامسن کے حوالے سے بتایا ہے کہ ’زخمی ہونے والے تین افراد میں سے ایک شخص 40 برس سے زائد عمر کا ہے جبکہ دو نوجوان ہیں۔‘

انسپکٹر سورن تھامسن نے رپورٹرز کو بتایا کہ ’فائرنگ کے بعد ایک 22 سالہ ڈینش نوجوان کو گرفتار کیا گیا ہے،‘

تاہم انہوں نے کہا کہ ’اس بات کے شواہد نہیں ہیں کہ کوئی اور شخص بھی اس واقعے میں ملوث ہے، اگرچہ پولیس تحقیقات کر رہی ہے۔‘

ڈنمارک میں گن وائلنس کے واقعات بہت کم دیکھنے میں آتے ہیں۔

انسپکٹر سورن تھامسن کے مطابق ’یہ کہنا بہت قبل از وقت ہوگا کہ سہ پہر کے بعد دارالحکومت کے مضافاتی علاقے سکینڈے نیویا کے ایک بڑے شاپنگ مال فیلڈز میں کی گئی اس فائرنگ کی وجہ کیا تھی۔‘

ایک عینی شاہد کے مطابق ’فائرنگ کی آواز سنتے ہی کچھ افراد دکانوں کے اندر چھپ گئے جبکہ بعض افراد خوف زدہ ہوکر دوڑ پڑے جس سے بھگدڑ مچ گئی۔‘

ایک 53 سالہ آئی ٹی کنسلٹنٹ ہینس کرسچیئن سٹولٹز جو اپنی بیٹیوں کے لیے اتوار کی رات شاپنگ مال کے قریب ہونے والے ایک کنسرٹ کے ٹکٹ خریدنے آئے تھے کا کہنا تھا کہ ’یہ سراسر دہشت گردی ہے، یہ خوفناک واقعہ ہے۔‘

انسپکٹر سورن تھوماسن نے ہلاک اور زخمی ہونے والے افراد کے مکمل اعدادوشمار نہیں بتائے تاہم ان کا کہنا تھا کہ ’واقعے میں کئی افراد ہلاک اور زخمی ہوئے ہیں۔‘