عمران خان کی مختلف مقدمات میں عبوری ضمانت میں توسیع

اسلام آباد کی مقامی عدالتوں نے مختلف مقدمات میں تحریک انصاف کے چیئرمین آئی عمران خان کی عبوری ضمانتوں میں 21 جولائی تک توسیع کردی ہے۔

پیر کو ڈسٹرکٹ سیشن عدالت اسلام آباد میں لانگ مارچ کے دوران توڑ پھوڑ کے معاملے پر عمران خان کے خلاف درج 10 مقدمات میں عبوری ضمانتوں کی درخواست پر سماعت سیشن جج کامران بشارت مفتی نے کی۔ سابق وزیاعظم کی جانب سے بابر اعوان پیش ہوئے۔

وکیل بابر اعوان نے عمران خان کی حاضری سے استثنا کی درخواست دی، جسے عدالت نے منظور کرتے ہوئے عبوری ضمانتوں میں 21 جولائی تک توسیع کر دی۔

ادھر مقامی عدالت میں عمران خان کے خلاف درج مقدمات کے معاملے پر سماعت ایڈیشنل سیشن جج ایسٹ عبدالغفور کاکڑ نے کی۔ عدالت نے 5 مقدمات میں عمران خان کی عبوری درخواست ضمانتیں پانچ پانچ ہزار روپے کے مچلکوں پر منظور کر لیں۔