متنازع ٹویٹس، ملک واپس پہنچنے پر انڈین اداکار ایئرپورٹ سے گرفتار

Reading Time: 2 minutes

انڈیا میں پولیس نے اداکار کمال راشد خان کو مُلک واپس پہنچنے پر ایئر پورٹ سے حراست میں لیا ہے۔

کمال راشد کو ان کی سنہ 2020 میں کی گئی متنازع ٹویٹس پر ممبئی پولیس نے گرفتار کیا۔

انڈین میڈیا کے مطابق ممبئی پولیس انہیں بوریولی کی مقامی عدالت میں پیش کر کے تفتیش کے لیے جسمانی ریمانڈ حاصل کرے گی۔

کمال راشد خان متعدد بالی وڈ فلموں بشمول ’منا پانڈے بیروزگار‘، ’دیش دروہی‘ اور ’ایک ولن‘ میں کام کرچکے ہیں لیکن پچھلے کچھ عرصے سے ان کی وجہ شہرت ان کی متازع ٹویٹس بنی ہوئی ہیں۔

ان کی گرفتاری سنہ 2020 میں کی گئی ایسی ٹویٹس کے مقدمے میں کی گئی جو انہوں نے آنجہانی اداکاروں عرفان خان اور رشی کپور کے حوالے سے کی تھیں۔

پولیس نے یہ نہیں بتایا گیا وہ متنازع ٹویٹس کون سی ہیں جن کی بنیاد پر کمال راشد خان کو گرفتار کیا گیا ہے۔

گرفتار کیے گئے انڈین اداکار اس سے قبل بھی اپنی ٹویٹس کی وجہ سے سوشل میڈیا پر ہدف تنقید بنے رہے ہیں۔

گذشتہ دنوں انہوں نے اپنی ٹویٹ میں دعویٰ کیا تھا کہ انڈین ٹیم کے سابق کپتان وراٹ کوہلی کے ’ڈپریشن‘ کی وجہ ان کی اہلیہ انشکا شرما ہیں۔ تاہم سوشل میڈیا پر تنقید کے بعد انہیں اپنی ٹویٹ ڈیلیٹ کرنا پڑی تھی۔

گزشتہ سال سلمان خان کی جانب سے بھی کمال راشد خان کے خلاف ہتک عزت کا دعویٰ دائر کیا گیا تھا اور اس کی وجہ بھی کچھ ٹویٹس ہی تھیں۔

سلمان خان کی قانونی ٹیم نے اس وقت کہا تھا کہ ’کمال آر خان نے کچھ ٹویٹس اور ویڈیوز پھیلائی ہیں جس میں یہ الزام لگایا گیا ہے کہ سلمان خان نے ان پر ہتک عزت کا مقدمہ درج کروایا ہے کیونکہ انہوں نے ان کی فلم ’رادھے‘ کا رویو کیا ہے۔ یہ بات غلط ہے۔‘

سلمان خان کی قانونی ٹیم کے مطابق ہتک عزت کا کیس اس لیے کیا گیا تھا کیونکہ کمال آر خان سلمان خان کے خلاف جھوٹے الزامات کی توثیق کررہے تھے کہ وہ ’بدعنوان‘، ’فراڈ‘ اور منی لانڈرنگ میں ملوث ہیں۔