مریم نواز کی پاسپورٹ واپسی کی درخواست، ہائیکورٹ کا بینچ پھر ٹوٹ گیا

Reading Time: < 1 minute

پاکستان کی لاہور ہائیکورٹ کے دورکنی بینچ کے ایک رکن نے مریم نواز کی پاسپورٹ واپسی کے لیے درخواست پر سماعت سے معذرت کر لی ہے۔

جمعرات کو لاہور ہائی کورٹ کے جسٹس انوار الحق پنوں نے درخواست پرسماعت سے معذرت کی۔ بینچ کے سربراہ جسٹس علی باقر نجفی نے فائل چیف جسٹس کو واپس بھجوا دی۔مریم نواز کی درخواست پر چیف جسٹس دوبارہ بینچ تشکیل دینگے۔

پاکستان مسلم لیگ (ن ) کی رہنما مریم نواز نے اپنی درخواست میں موقف اختیار کیا تھا کہ چار سال سے پاسپورٹ عدالتی تحویل میں ہے۔ اب تک نیب چوہدری شوگر مل کا چالان پیش نہیں کر سکا جبکہ عدالت نے میرٹ پر ضمانت منظور کی۔

درخواست میں مزید کہا گیا تھا کہ لمبے عرصے کے لیے کسی شخص کو اس کے بنیادی حق سے محروم نہیں رکھا جا سکتا۔ پرویز مشرف اور ایان علی کے کیسز کے فیصلے اس کی نظیر ہیں۔

یہ چوتھی بار ہے کہ مریم نواز کی درخواست سننے والا بینچ ٹوٹ گیا.