آپ باتیں جنرل فیض تک پہنچاتے ہیں، چیف الیکشن کمشنر کا رپورٹر سے گلہ

Reading Time: 3 minutes

چیف الیکشن کمشنر سکندر سلطان راجہ نے نجی ٹی وی چینل کے ایک رپورٹر سے متعلق انکشاف کیا ہے کہ وہ اُن کی باتیں جنرل فیض حمید کو پہنچاتے رہے ہیں۔

الیکشن کمیشن میں رپورٹرز سے غیر رسمی گفتگو کے دوران چیف الیکشن کمشنر نے مختلف سوالوں کے جواب دیے۔

چیف الیکشن کمشنر سکندر سلطان راجہ کا کہنا تھا کہ اس میں کوئی شک نہیں چیئرمین پی ٹی آئی ملک کے مقبول لیڈر ہیں۔

چیف الیکشن کمشنر کے مطابق چیرمین پی ٹی آئی ملک کی ایک بڑی سیاسی جماعت کے سربراہ ہیں۔

چیف الیکشن کمشنر کا کہنا تھا کہ چیئرمین پی ٹی آئی کو چاہیے تھا کہ تحمل سے کام لیتے۔

چیف الیکشن کمشنر نے کہا کہ چیرمین پی ٹی آئی کی دل سے عزت کرتا ہوں، خواہش تھی کہ تمام سیاستدانوں کو ساتھ بٹھاتا۔

انہوں نے کہا کہ میں ماضی میں چیرمین پی ٹی آئی کو آئیڈلائز کرتا تھا، خواہش تھی چیرمین پی ٹی آئی سیاسی ماحول میں تحمل والا کردار ادا کرتے۔

اُن سے پوچھا گیا کہ پولنگ ڈے اتوار کا دن کیوں نہیں رکھا؟

چیف الیکشن کمشنر نے مسکراتے ہوئے جواب دیا کہ چلیں اس بہانے سکول کے بچوں کو ایک اور چھٹی مل جائے گی۔

انہوں نے کہا کہ صدر سے ملنے سے انکار نہیں کیا نہ ملنے کا فیصلہ کمیشن کا تھا۔

اُن کا کہنا تھا کہ سپریم کورٹ میں ہم نے 11 فروری کی تاریخ دی تھی، ہم نے تو صدر مملکت کو لیٹر میں 11 کی تاریخ دی۔

چیف الیکشن کمشنر نے کہا کہ پھر متفقہ فیصلہ ہوا کہ 8 تاریخ کو الیکشن ہوں، پہلے بھی فروری میں الیکشن ہوتے رہے ہیں۔ الیکشن کمیشن کا گراؤنڈ ڈبل کنکریٹ کا ہے۔ سارے ادارے محترم ہیں لیکن الیکشن کمیشن تو اپنے مؤقف پر کھڑا ہے۔

انہوں نے کہا کہ کے پی اور پنجاب اسمبلی تحلیل ہوئی تو الیکشن کمیشن نے سٹینڈ لیا کہ پورے ملک میں انتحابات ایک ساتھ ہوں۔ ہر کوئی کہتا ہے الیکشن شفاف ہوں لیکن دوسری جانب مداخلت بھی کی جاتی ہے۔

الیکشن کمشنر کا کہنا تھا کہ صدر مملکت نے ہمیں اچھے طریقے سے ویلکم کیا جس کی تصاویر آپ نے دیکھ لیں ہوں گی۔ ہماری کوشش تھی کہ اتوار کا روز پولنگ کے لیے اچھا رہے گا لیکن جب چار لوگ مل کر بیٹھتے ہیں تو گنجائش نکل آتی ہے۔

چیف الیکشن کمشنر نے کہا کہ انتخابات میں فوج ہماری مدد کرے گی، اٹارنی جنرل ہمارے فیملی فرینڈ ہیں۔

چیف الیکشن کمشنر نے کہا کہ نگران حکومت بنانا الیکشن کمیشن کا کام نہیں لیکن ان کو چیک کرنا ہمارا کام ہے، سی ڈی اے ممبرز کا پھڈا پڑا میں کسی کو نہیں جانتا۔ ہم نے دو ممبرز سی ڈی اے کے تبدیل کیے جو سب سے دیکھا۔

صحافی نے سوال کیا کہ الیکشن کمیشن کے خط کے باوجود آئی جی اسلام آباد اور ڈپٹی کمشنر اسلام آباد کیوں تبدیل نہیں ہو رہے؟

چیف الیکشن کمشنر نے کہا کہ آپ دیکھتے جائیں۔ تمام جماعتوں کو لیول پلئینگ فیلڈ کی فراہم کرنے کی زمہ داری شیڈول جاری ہونے کے بعد آئے گی۔

چیف الیکشن کمشنر نے ملاقات میں موجود ایک رپورٹر سے گلہ کیا کہ وہ اُن کی باتیں جنرل فیض حمید تک پہنچاتے رہے ہیں۔

رپورٹر نے کہا کہ وہ حلفیہ کہتے ہیں کہ ایسی کوئی بات نہیں کی۔

سکندر سلطان راجہ نے بتایا کہ رپورٹر نے اُن سے ملاقات کی اور اس کے کچھ دیر بعد جنرل فیض حمید کا فون آیا جنہوں وہی باتیں من و عن بتائیں جو ملاقات میں کی گئی تھیں۔

چیف الیکشن کمشنر تحریک انصاف اور عمران خان سے ہمدری رکھنے والے مذکورہ رپورٹر سے اس سے قبل بھی یہ گلہ کر چکے ہیں کہ وہ اُن کی باتیں آبپارہ والوں (آئی ایس آئی ہیڈکوارٹر) سے شیئر کرتے رہے ہیں۔

سکندر سلطان راجہ نے دس رپورٹرز کی موجودگی میں مذکورہ رپورٹر سے کہا کہ جب انہوں نے عہدہ سنبھالا تو وہ سب سے پہلے آئے اور ملاقات کی اس اُن کو اپنا بڑا بھائی کہا۔

انہوں نے گلہ کیا کہ مذکورہ سے ایک ملاقات کے بعد جنرل فیض حمید نے فون کر کے بتایا کہ کس قسم کے لوگوں سے ملتے ہیں جو شیئر کی گئی باتیں آگے پہنچاتے ہیں۔