نیو یارک کے ٹائم سکوائر پر مریم نواز کا اشتہار پنجاب کے عوام کو کتنے میں پڑا؟

پاکستان کے صوبے پنجاب کی وزیراعلی مریم نواز کے نیو یارک کے ٹائم سکوائر میں الیکٹرانک اشتہار لگوانے کو تنقید کا نشانہ بنایا گیا تھا تاہم اب اس اشتہار پر کیے گئے اخراجات کی تفصیل بھی سامنے آ گئی ہے۔

اشتہار کی تصاویر وائرل ہونے کے بعد فیس بُک پر سوشل میڈیا ایکٹیوسٹ معاذ بن محمود نے لکھا تھا کہ:
اس قسم کے اشتہار کی قیمت محتاط اندازے کے مطابق پچیس سے پچاس ہزار امریکی ڈالر ہوتی ہے۔

صوبہ پنجاب میں انفارمیشن ٹیکنالوجی کے انقلاب کے نعرے پر مشتمل یہ اشتہار سات دن کے لیے آویزاں کیا گیا تھا۔

صحافی سعدیہ مظہر نے حسن مغل کے ذریعے رائٹ ٹو انفارمیشن ایکٹ کے تحت اس اشتہار کی لاگت کی بابت استفسار کیا۔

منگل کو حسن مغل کے مطابق انہیں سرکاری جواب موصول ہوا ہے جس میں کہا گیا ہے کہ اس تشہیر کے لیے منظور ہونے والی بولی کی قیمت ایک کروڑ 97 لاکھ 47 ہزار 253 روپے تھی۔

‏19747253.0000000 PKR ONLY

یہ رقم 71 ہزار 186 امریکی ڈالر بنتی ہے۔