برطانوی وزیر صحت ’گالیوں والے واٹس ایپ تبصروں‘ پر عہدے سے برطرف

Reading Time: 2 minutes

برطانیہ کے وزیراعظم کیر سٹارمر نے وزیر صحت اینڈریو گیون کو اُن کے عہدے سے برطرف کر دیا ہے۔

عالمی ذرائع ابلاغ کی رپورٹس کے مطابق وزیراعظم نے وزیر صحت کے نامناسب اور گالیوں والے واٹس ایپ میسجز سامنے آنے کے بعد اینڈریو گیون کو اُن کے عہدے سے ہٹایا۔

گورٹن اور ڈینٹن کے علاقے سے منتخب ہونے والے اینڈریو گیون کی رکنیت اُن کی پارٹی لیبر نے بھی معطل کر دی تھی جب میل آن سنڈے نے ان واٹس ایپ پیغامات کو رپورٹ کیا تھا جن میں انتخابی حلقے کے ووٹرز، ساتھی ایم پیز اور کونسلرز کی توہین کی گئی تھی۔

گیون پہلی بار 2005 میں لیبر پارٹی کی ٹکٹ پر پارلیمنٹ کے رکن منتخب ہوئے تھے، وہ ڈینٹن اور ریڈش حلقے کی نمائندگی کرتے تھے۔ حلقے کی حد میں تبدیلی کے بعد وہ گزشتہ سال گورٹن اور ڈینٹن کے لیے ایم پی منتخب ہوئے تھے۔

وہ گزشتہ سال موسم گرما میں ہونے والے انتخابات کے بعد بننے والی حکومت کے تیسرے ایسے وزیر ہیں جن کو عہدہ چھوڑنا پڑا ہے۔

جنوری میں ٹیولپ صدیق وزیر خزانہ کے طور پر اور گزشتہ نومبر میں لوئیس ہیگ کو ٹرانسپورٹ سیکریٹری کے طور پر عہدوں سے الگ ہونا پڑا تھا۔

ٹیولپ صدیق نے بنگلہ دیش میں اپنی خالہ حسینہ واجد کی سیاسی تحریک سے متعلق الزامات پر استعفیٰ دیا، جبکہ ہیگ نے اس وقت استعفیٰ دیا جب یہ سامنے آیا کہ انہوں نے دفتری موبائل فون کی چوری سے متعلق جھوٹ بولا تھا۔

ایک حکومتی ترجمان نے کہا کہ وزیراعظم کیئر سٹارمر ’عوامی عہدوں پر فائز افراد کے اعلیٰ معیارات کو برقرار رکھنے کے لیے پرعزم ہیں‘ اور "ان معیارات پر پورا نہ اترنے والے کسی بھی وزیر کے خلاف کارروائی کرنے سے دریغ نہیں کریں گے۔‘

گیون نے ایکس پر پوسٹ میں کہا کہ وہ ’بری طرح سے لیے گئے‘ تبصروں کی وجہ سے ہونے والی کسی بھی دل آزاری کے لیے معذرت خواہ ہیں۔

انہوں نے مزید کہا کہ وہ وزیراعظم اور لیبر پارٹی کے فیصلے کو سمجھتے ہیں، اور یہ کہ ’معطل کیے جانے پر بہت دکھ ہوا، مگر میں ہر طرح سے ان کی حمایت کروں گا۔‘

لیبر کے ایک ترجمان نے کہا کہ 50 سالہ گیون کو بطور پارٹی ممبر ’انتظامی طور پر معطل‘ کر دیا گیا ہے کیونکہ ’لیبر پارٹی قواعد و ضوابط کے مطابق اس واٹس ایپ گروپ میں کیے گئے تبصروں‘ کی تحقیقات کر رہی ہے۔
ترجمان نے مزید کہا کہ ’لیبر پارٹی کے اراکین کے طور پر ان سے متوقع اعلٰی معیار کی خلاف ورزی کرنے پر کارروائی کی جاتی ہے۔‘

اتوار کو میل آن سنڈے میں شائع کیے گئے پیغامات کے مطابق گیوین نے واٹس ایپ پر اپنے علاقے کی ایک خاتون کا خط دیکھنے کے جواب میں لکھا تھا کہ انہیں امید ہے کہ یہ 72 سالہ خاتون جلد ہی مر جائے گی۔
اخبار نے رپورٹ کیا کہ کونسلر نے خاتون کا خط گیون اور دیگر لیبر شخصیات کے ساتھ ایک واٹس ایپ گروپ میں شیئر کیا تھا۔

اخبار نے کہا کہ وزیر صحت نے حلقے میں ایک شخص کو ٹرک سے ٹکرانے کا بھی مذاق اڑایا۔
گیوین نے مبینہ طور پر انجیلا رینر کے بارے میں جنسی تبصرے اور لیبر ایم پی ڈیان ایبٹ کے بارے میں نسل پرستانہ تبصرے بھی کیے تھے۔

کنزرویٹو نے کہا کہ پیغامات سے ظاہر ہوتا ہے کہ پارٹی میں ’گند‘ ہے جسے ’صاف کرنے کی ضرورت ہے۔‘
ٹوری پارٹی کے شریک چیئرمین نائیجل ہڈلسٹن نے کہا کہ لیبر پارٹی میں پنشنرز کی واضح توہین ہے۔