تحریک انصاف کی یادداشت پر سپریم کورٹ کا اعلامیہ جاری
پاکستان تحریک انصاف (پی ٹی آئی) سے وابستہ اراکین پارلیمنٹ کا ایک گروپ، جس میں وزیراعلیٰ خیبر پختونخوا بھی شامل تھے، 30 جنوری 2026 کو سپریم کورٹ کے سامنے اپنے قید رہنما تک رسائی کے حوالے سے تحفظات بتانے کے لیے اکھٹے ہوئے۔
رجسٹرار سپریم کورٹ نے نمائندوں سے بات چیت کی اور یقین دلایا کہ تحفظات کو چیف جسٹس کے نوٹس میں لایا جائے گا۔ بعد ازاں، ان کے وکیل جناب سلمان اکرم راجہ، ایڈووکیٹ سپریم کورٹ، کو چیف جسٹس نے حاضری سے نوازا۔ بات چیت کے دوران، پی ٹی آئی کے قید رہنما تک رسائی، بشمول خاندان کے افراد اور طبی ٹیم کی رسائی سے متعلق خدشات سے آگاہ کیا گیا۔ چونکہ اٹھایا گیا معاملہ براہ راست سپریم کورٹ میں زیر التواء کارروائی سے متعلق نہیں تھا، اس لیے تحفظات کو قانون کے مطابق غور کے لیے متعلقہ ایگزیکٹو حکام کو بھیجا گیا، جس پر اجتماع پرامن طور پر منتشر ہوگیا۔
اعلامیہ کے مطابق ایک ہفتے تک جواب نہ ملنے پر سینیٹ اور قومی اسمبلی میں اپوزیشن رہنماؤں پر مشتمل وفد نے ایک بار پھر 6 فروری 2026 کو ایک دستخط شدہ میمورنڈم کے ساتھ سپریم کورٹ سے رجوع کیا، جسے رجسٹرار سپریم کورٹ نے باضابطہ طور پر وصول کیا۔
قید پی ٹی آئی رہنما تک رسائی اور میڈیکل رپورٹس کی فراہمی سے متعلق خدشات کو ایک بار پھر قانون کے مطابق مناسب غور و خوض کے لیے متعلقہ ایگزیکٹو حکام کو پہنچا دیا گیا۔
سپریم کورٹ نے مستقبل میں ایسے واقعات سے نمٹنے اور متاثرہ فریقین کو شامل کرنے کے لیے سٹینڈرڈ آپریٹنگ پروسیجرز (SOPs) بھی جاری کیے ہیں۔ ایس او پیز ادارہ جاتی ڈیکورم، عدالتی کاموں، یا دیگر مدعیان کی رسائی کے حقوق پر سمجھوتہ کیے بغیر، رسائی، سہولت کاری، اور ایمرجنسی میڈیکل کور سمیت ضروری سہولیات کی فراہمی کو یقینی بنانے پر زور دیتے ہیں۔
عدالت نے ایس او پیز کی تفصیل جاری نہیں کی.
