واشنگٹن میں کشمیریوں سے اظہارِ یکجہتی، پاکستانی سفارتخانے کے باہر غائبانہ نمازِ جنازہ
واشنگٹن ڈی سی — سید فیصل علی
امریکا میں مقیم پاکستانیوں کی بڑی تعداد نے اتوار کے روز واشنگٹن ڈی سی میں پاکستانی سفارتخانے کے باہر جمع ہو کر کشمیریوں سے اظہارِ یکجہتی کیا اور منتظمین کی جانب سے “شہیدانِ کشمیر” قرار دیے گئے افراد کی غائبانہ نمازِ جنازہ ادا کی۔
شدید بارش اور خراب موسم کے باوجود مظاہرے میں بڑی تعداد میں افراد شریک ہوئے۔ یہ اجتماع سابق پاکستانی عہدیدار اور پاکستان تحریکِ انصاف کے رہنما شہباز گل کی اپیل پر منعقد کیا گیا تھا، جنہوں نے امریکا میں مقیم پاکستانیوں اور کشمیریوں سے یکجہتی کے اظہار کی درخواست کی تھی۔
شرکاء نے پاکستانی سفارتخانے کے سامنے غائبانہ نمازِ جنازہ ادا کی اور پاکستان کے زیرِ انتظام کشمیر کی موجودہ صورتحال پر تشویش کا اظہار کیا۔ مقررین اور مظاہرین نے خطے میں جاری پیش رفت پر عالمی توجہ مبذول کرانے اور کشمیری عوام کے ساتھ حمایت جاری رکھنے پر زور دیا۔
منتظمین کے مطابق موسلا دھار بارش کے باوجود بڑی تعداد میں لوگوں کی موجودگی اس بات کا ثبوت تھی کہ شرکاء کشمیریوں کے ساتھ اظہارِ یکجہتی کے لیے پُرعزم ہیں۔
مظاہرین نے کہا کہ ناموافق موسم بھی انہیں کشمیریوں کے حق میں آواز بلند کرنے سے نہیں روک سکتا۔ نمازِ جنازہ اور تقاریر کے بعد مظاہرہ پُرامن طور پر اختتام پذیر ہو گیا۔
