ہزارہ قبیلے کا قتل عام جاری

ایک ایسے وقت جب کہ ملک میں سیاسی ہلچل ہے بلوچستان میں ہزارہ قبیلے کے افراد کا قتل عام جاری ہے ۔ کوئٹہ میں فائرنگ کے ایک واقعے میں ہزارہ قبیلے کے تین افراد سمیت پانچ افراد مارے گئے ہیں ۔

 پولیس کے ایک اہلکار نے بتایا کہ یہ واقعہ کاسی سٹریٹ کے محلہ اللہ ڈنہ میں پیش آیا۔ اہلکار نے بتایا کہ چھ افراد ایک گاڑی میں سبزی لینے کے لیے ہزار گنجی جا رہے تھے کہ نامعلوم مسلح افراد نے اس علاقے میں گاڑی پر حملہ کیا۔ حملے کے نتیجے میں پانچ افراد جاں بحق اور ایک زخمی ہوگیا۔ واقعے کے بعد حملہ آور فرار ہونے میں کامیاب ہوگئے۔

پولیس اہلکار نے بتایا کہ ہلاک ہونے والے تین افراد کے علاوہ زخمی شخص کا تعلق ہزارہ قبیلے سے ہے۔ مارے جانے والوں میں ایک راہ گیر بھی شامل ہے ۔

ہزارہ قبیلے سے تعلق رکھنے والے افراد کا تعلق شیعہ مسلک سے ہے۔ کوئٹہ اور اس کے نواحی علاقوں میں برسوں سے اس قبیلے سے تعلق رکھنے والے افراد کو نشانہ بنایا جا رہا ہے۔