سیاسی جماعتوں کی رجسٹریشن شرائط درست

سپریم کورٹ نے سیاسی جماعتوں کی رجسٹریشن منسوخی کے خلاف دائر درخواستوں کی سماعت کرتے ہوئے انتخابی اصلاحات ایکٹ کی شقوں کو درست قرا ر دیا ہے ۔ عدالت نے قرار دیا ہے کہ انتخابی اصلاحات ایکٹ میں سیاسی جماعت کی رجسٹریشن کے لئے طے کردہ اصول بالکل درست ہیں ۔

عدالت نے درخواست گزار سیاسی جماعتوں کو رجسٹریشن کی مطلوبہ شرائط پوری کرنے کیلئے 19 مارچ تک مہلت دی ہے ۔ چیف جسٹس ثاقب نثار کی سربراہی میں تین رکنی بنچ نے 24 سیاسی جماعتوں کی اپیلو ں پر سماعت کی ۔ سیکرٹری الیکشن کمیشن بھی عدالت میں پیش ہوئے ۔

سیاسی پارٹیوں کے وکلاء نے عدالت کو بتایا الیکشن کمیشن نے سیاسی جماعتوں کیلئے 2 ہزار افراد کی ممبر شپ اور 2 لاکھ روپے جمع کرنے کا قانون طے کیا ہے، ہم نے طے کردہ شرائط کو پورا تو کر لیا لیکن وقت گزر چکا تھا ۔ عدالت نے قوائد پر پورا نہ اترنے والی جماعتوں کو شرائط پوری کرنے کیلئے 19 مارچ تک مہلت دیدی ۔ دوران سماعت سیاسی جماعتوں کے نمائندوں نے شو ر شرابا بھی کیا ۔ کچھ درخواست گذاروں نے انتخابی اصلاحات ایکٹ کی شقوں کو چیلنج بھی کر رکھا تھا ۔ عدالت نے قرار دیا کہ سیاسی جماعتوں کی رجسٹریشن کیلئے انتخابی اصلاحات ایکٹ کی شقیں اور شرائط بالکل درست ہیں ۔

درخواست گزاروں میں محمد علی درانی کی ملت پارٹی اور پاکستان سپریم ڈیموکریٹک پارٹی شامل ہیں ۔