گلوکارہ قتل کے ملزم کا جسمانی ریمانڈ
Reading Time: 2 minutesسندھ کے ضلع لاڑکانہ کی مقامی عدالت نے حاملہ گلوکارہ ثمینہ سندھو کے قتل کے ملزم کو سات دن کے جسمانی ریمانڈ پر پولیس کے حوالے کر دیا ہے ۔ گلوکارہ کے قتل کے خلاف مختلف شہروں میں گلوکاروں نے احتجاجی مظاہرے بھی کیے ہیں ۔
لاڑکانہ پولیس کا کہنا ہے کہ ختنے کی تقریب کے دوران فائرنگ سے مقامی گلوکارہ ثمینہ سندھو ہلاک ہو گئی تھیں ۔ گلوکارہ ثمینہ سندھو کے قتل کے خلاف حیدرآباد، سکھر، دادو، کندھ کوٹ اور ٹنڈو محمد خان میں گلوکاروں نے احتجاجی مظاہرے کیے ۔ مظاہروں میں مفرور ملزمان کی بھی گرفتاری کا مطالبہ کیا گیا ۔
گرفتار ملزم طارق جتوئی کو پولیس نے سول ایڈیشنل مجسٹریٹ کی عدالت میں پیش کیا ۔ عدالت نے ملزم کو سات روز کے جسمانی ریمانڈ پر پولیس کے حوالے کر دیا ہے ۔ ملزم طارق جتوئی کا موقف ہے کہ وہ سامنے بیٹھی ثمینہ نے تین گیت گائے اور اس دوران میں نے ہوائی فائرنگ کی جس میں سے ایک گولی اس کو لگ گئی ۔ ملزم کے مطابق ٹارگٹ کرکے گولی نہیں چلائی ۔ ملزم نے اس الزام کو مسترد کیا کہ انھوں نے ثمینہ کو کھڑے ہوکر گانے کو کہا تھا اور ملزم کہ اس نے جیسے کھڑے ہوکر گانا شروع کیا تو اس کو گولی لگ گئی ۔
گلوکارہ ثمینہ سندھو کے شوہر عاشق سموں کا کہنا ہے کہ صرف ان کی بیوی کا نہیں بلکہ بچے کا بھی قتل ہوا ہے کیونکہ وہ حاملہ تھیں ۔ کنگا پولیس نے عاشق سموں کی درخواست پر ملزم طارق سمیت تین ملزمان کے خلاف قتل کا مقدمہ درج کیا تھا ۔ عاشق سموں کی مقدمے کی درخواست کے مطابق ان کی 20 سالہ بیوی ثمینہ جو 8 ماہ کی حاملہ تھی تقریب میں محفل موسیقی میں گانے گئی تھیں۔
عاشق سموں کے مطابق رات کو محفل جاری تھی وہ سامنے کرسیوں پر بیٹھے ہوئے تھے کہ طارق جتوئی اور دو دیگر کھڑے ہوگئے جن کے ہاتھوں میں پستول تھے اور ثمینہ کو کھڑے ہو کر گانے کو کہا لیکن اس نے جواب دیا کہ وہ حاملہ ہیں کھڑے ہو کر نہیں گا سکتیں جس پر ملزم طارق نے فائرنگ کر دی ۔
ثمینہ سندھو کی پوسٹ مارٹم رپورٹ اور ملزم کی میڈیکل رپورٹ تاحال سامنے نہیں آ سکی ہے ۔ پولیس کا کہنا ہے کہ دو مفرور ملزمان کی گرفتاری کے لیے چھاپے مارے جا رہے ہیں ۔ ایس ایس پی لاڑکانہ تنویر تنیو کے مطابق ختنے کی تقریب کے دوران موسیقی کی محفل کے ساتھ ہوائی فائرنگ بھی کی جا رہی تھی کہ اسی دوران اتفاقی طور پر ایک گولی گلوکارہ ثمینہ سندھو کو لگی جس سے وہ جانبر نہ ہو سکیں ۔
ثمینہ سندھو مقامی گلوکارہ تھی ان کی آٹھ کیسٹس مارکیٹ میں آ چکی ہیں ۔
