گورمے بیکری اور جی این این چینل بند کریں

Reading Time: 2 minutes

سپریم کورٹ لاہور رجسٹری میں گورمے بیکری کی آئسکریم میں مضر صحت اجزا کی موجودگی پر لئے گئے نوٹس کی سماعت کرتے ہوئے چیف جسٹس نے بیکری کے ذمہ داران کو کل طلب کر لیا ہے ۔ عدالت نے جی این این چینل پر ڈی جی فوڈ پنجاب کے خلاف مہم چلانے کا نوٹس لیتے ہوئے پیمرا کو بھی نوٹس جاری کر دیا ہے ۔

چیف جسٹس نے گورمے بیکرز کے آئسکریم کے پروڈکشن یونٹ بند کرنے کا حکم دیا ۔ عدالت میں ڈی جی فوڈ پنجاب کیپٹن ریٹائرڈ عثمان نے شکایات کے انبار لگاتے ہوئے کہا کہ کارروائی کرنے پر گورمے بیکری کے نیوز چینل جی این این نیوز نے کردار کشی کی مہم چلائی گئی جس پر عدالت نے پیمرا سے جواب طلب کیا ہے ۔

چیف جسٹس نے کہا کہ نجی بیکری کی تمام پراڈکٹس کا تجزیہ کیا جائے، چیف جسٹس نے نجی کمپنی کی آئسکریم کا پروڈکشن یونٹ سیل کرنے کا حکم بھی دیا ۔

ڈی جی فوڈ نے بتایا کہ دیگر نیوز چینلز اور اخبارات نجی بیکری کی ناقص پروڈکٹس کے خلاف خبر نہیں لگاتے جس پر چیف جسٹس نے ڈی جی پیمرا سے کل تک جواب طلب کرلیا ۔

چیف جسٹس نے گورمے بیکری اور جی این این کے مالک شہریار چٹھا اور ذوالقرنین چٹھا کو کل طلب کر لیا ۔ چیف جسٹس نے چینل کے بیورو چیف خالد قیوم کی سخت سرزنش کی اور کہا کہ تمہاری جرات کیسے ہوئے مجھے سفارش کروانے کی، رات گئے مجھے سفارشی فون کرواتے ہو کیسے لوگ ہیں آپ ؟

چیف جسٹس نے کہا کہ جو میرے پاس سفارش لیکر آئے اسے اپنا انجام یاد ہونا چاہیے، یہ چٹھا کیسے اتنا بڑا بزنس مین بن گیا، اس کی چھان بین ہوگی تو سب پتہ چل جائے گا ۔

چیف جسٹس نے کہا کہ آپ نے چینل اسلیے بنایا کے دیگر کاروبار کو سیف کرسکو، آپ بدمعاشی کرتے ہیں سرکاری آفیسر کے خلاف مہم چلاتے ہیں ۔

مجھے چینل بند کرنا پڑا تو کردوں گا، چیف جسٹس کا جی این این انتظامیہ پر شدید اظہار برہمی، کہا کہ کردار کشی مہم توہین عدالت کے مترادف ہے۔ چیف جسٹس نے کہا کہ کیوں نہ جی این این کو چند دنوں کے لیے یا مستقل بند کر دیا جائے۔

چیف جسٹس نے کہا کہ میں دیکھتا ہوں کون سا چینل اور اخبار ناقص اشیا بنانے والی کمپنیز کے خلاف خبر نہیں چلاتا ۔