وزیراعظم کی تنخواہ نہیں بڑھی

پاکستان کے پرائم منسٹر آفس نے وزیراعظم عمران خان کی تنخواہ میں اضافے کی خبر کی سختی سے تردید کرتے ہوئے کہا ہے کہ ایک ایسے وقت میں جب وزیراعظم نہ صرف ہر ممکنہ طریقے سے حکومت کے اخراجات میں کمی لانے کی مہم چلا رہے ہیں اور جس کا آغاز انہوں نے اپنی ذات سے کیا ایسی بے بنیاد اور من گھڑت خبروں کی تشہیر نہایت افسوس ناک ہے۔

ترجمان نے کہا کہ وزیراعظم کی ہدایت پر کابینہ کے حالیہ اجلاس میں صدر اور وزیر اعظم کی تنخواہوں اور مراعات میں ترمیم کرتے ہوئے یہ فیصلہ کیا گیا کہ اب صدر اور وزیر اعظم کے لیے صرف ایک رہائشگاہ کو کیمپ آفس کا درجہ دیا جا سکے گا۔

کابینہ کے اجلاس میں وزیراعظم نے واضح ہدایت کی کہ ماضی کی روش کی بجائے کیمپ آفسز میں ہونے والے اخراجات کی بھی ایک حد مقرر کی جائے۔ وزیراعظم نے کہا کہ سربراہان حکومت پر اٹھنے والے اخراجات عوام کی خون پسینے کی کمائی سے پورے کیے جاتے ہیں لہذا کوشش کی جائے کہ یہ اخراجات کم سے کم ہوں۔

واضح رہے کہ بدھ کو پاکستان کے ٹی وی چینلز نے خبر نشر کی تھی کہ وزیراعظم عمران خان کی تنخواہ میں چار لاکھ روپے کا اضافہ کیا گیا ہے۔

وزیراعظم عمران نے گذشتہ دنوں کہا تھا کہ ان کی تنخواہ کم ہے جس میں گزارا نہیں ہوتا۔