تھائی فوجی نے 27 افراد کیوں قتل کیے؟
تھائی لینڈ میں 27 افراد کو مشین گن سے فائرنگ کرنے والے فوجی کو پولیس نے شاپنگ مال کے تہہ خانے میں گھس کر موت کے گھاٹ اتار دیا تاہم اس قتل عام کی وجہ کے بارے میں وزیراعظم پرایوت چن او شا نے کہا ہے کہ سکیورٹی اہلکار نے ایسا ’ذاتی مسئلے‘ کی وجہ سے کیا اور اس کو گھر کے خالی کرائے جانے کا غصہ تھا۔
تھائی لینڈ کے ذرائع ابلاغ کے مطابق اتوار کو تھائی وزیراعظم نے کہا کہ ’یہ تھائی لینڈ میں غیر معمولی واقعہ ہے اور میں چاہتا ہوں کہ اس طرح کا یہ آخری واقعہ ہو۔‘
فائرنگ سے زخمی افراد کی عیادت کے بعد ہسپتال کے باہر میڈیا سے گفتگو میں تھائی لینڈ کے وزیراعظم نے بتایا کہ یہ واقعہ اہلکار کے گھر کی فروخت سے جڑا ہوا ہے۔
اتوار کی صبح تھائی لینڈ پولیس کے سربراہ اور وزیر صحت نے حملہ آور اہلکار کے مارے جانے کی تصدیق کی اور پولیس حکام کے مطابق سکیورٹی اہلکار نے مشین گن سے فائرنگ کر کے کم از کم 21 افراد کو ہلاک کر دیا تھا۔
تھائی لینڈ کے فوجی نے اسلحہ لے کر شاپنگ مال اور قریبی علاقے میں 17 گھنٹے تک خوف و ہراس پھیلائے رکھا اور 27 افراد کو قتل کرنے کے علاوہ 21 کو زخمی بھی کیا۔
