لاہور ہائیکورٹ کے جسٹس بھی کورونا سے متاثر

پاکستان کے صوبہ پنجاب کی ہائیکورٹ کے جسٹس شاہد کریم میں کورونا وائرس کی تصدیق کی گئی ہے جبکہ ملک میں عالمی وبا سے گزشتہ 24 گھنٹوں میں مزید 97 افراد ہلاک ہو گئے ہیں جس کے بعد مرنے والوں کی تعداد ایک ہزار 935 تک پہنچ گئی ہے۔

لاہور ہائیکورٹ کے رجسٹرار دفتر کے مطابق جسٹس شاہد کریم کے دو مخلتف ہسپتالوں سے کورونا ٹیسٹ کیے جو مثبت آئے جس کے بعد انہوں نے خود کو اپنی رہائش گاہ میں قرنطینہ کیا ہے اور ان کی حالت بہتر ہے۔

کورونا وائرس کے تیزی سے پھیلاؤ کو وزیراعظم عمران خان نے بھی تسلیم کیا ہے تاہم ان کا کہنا تھا کہ دوبارہ لاک ڈاؤن کے متحمل نہیں ہو سکتے کیونکہ اس سے امیروں کو فرق نہیں پڑتا اور غریب و مزدوز پیشہ افراد متاثر ہوتے ہیں۔

سرکاری اعداد وشمار کے مطابق گزشتہ 24 گھنٹوں میں پاکستان میں چار ہزار 715 مثبت کیسز کی تصدیق ہوئی۔

ملک میں وائرس سے متاثر ہونے والوں کی تعداد 94 ہزار کے لگ بھگ ہے جبکہ 32 ہزار سے زائد صحت یاب بھی ہوئے ہیں۔ پنجاب میں ساڑھے چھ سو سے زائد افراد کی ہلاکت ہوئی ہے۔