زرداری عدالت میں پیش، نواز شریف کی درخواست دائر

Reading Time: 2 minutes

پاکستان کے سابق صدر آصف زرداری توشہ خانہ ریفرنس میں ذاتی حیثیت میں عدالت میں پیش ہوگئے جب کہ عدالت نےفرد جرم عائد کرنے کےلیے 9 ستمبر کی تاریخ مقرر کر دی ہے۔

ریفرنس میں سابق وزیراعظم نواز شریف اشتہاری قرار دینےیا ٹرائل میں شامل کرکےفرد جرم عائد کرنے کا فیصلہ 25 اگست کو ہوگا۔

پیر کو سابق صدر آصف زرداری توشہ خانہ ریفرنس میں ذاتی حیثیت میں احتساب عدالت میں پیش ہوئے۔ سابق صدر کورونا سے بچاؤ کیلئے این نائٹی فائیو ماسک پہنے عدالت آئے، آصفہ بھٹو بھی ان کے ہمراہ تھیں ۔

آصف زرداری کمرہ عدالت پہنچے تو بلاول بھٹو نے پارٹی ورکرزکو کمرہ عدالت سے باہر بھیج دیا۔

بلاول بھٹو زرداری نے کہا کہ کورونا چل رہا ہے کچھ خیال کریں۔ راجا پرویز اشرف، مصطفیٰ نواز کھوکھر اور دیگر رہنما کمرہ عدالت سےباہر چلے گئے۔

وکیل صفائی اور نیب کی پراسیکیوشن ٹیم کے درمیان تلخ کلامی بھی ہوئی۔ آصف زرداری کے وکیل فاروق نائیک نےکہا کہ سابق صدر بیمار ہیں، پہلےعدالت یہ فیصلہ کرے کہ کیا وکلا بغیر رکاوٹ عدالت میں پیش ہوسکتے ہیں؟

سابق صدر بطور ملزم روسٹرم پر آئےاوران کی عدالت میں حاضری لگائی گئی۔ دورانِ سماعت نواز شریف کی جانب سے بیرسٹر جہانگیر جدون نے وکالت نامہ داخل کرایا۔

ڈپٹی پراسیکیوٹر نیب سردار مظفرعباسی نے کہا کہ نوازشریف کو عدالت مفرور قرار دے چکی ہے اور انہیں اشتہاری قرار دینے کی کارروائی جاری ہے۔

بعد ازاں عدالت نے آصف زرداری پر فرد جرم کے لیے 9 ستمبر کی تاریخ مقرر کرتے ہوئے انہیں آئندہ سماعت پر پیش ہونے کا حکم دیا۔

عدالت نے یوسف رضا گیلانی، عبدالغنی مجید اور انور مجید کو بھی 9 ستمبر کو طلب کرلیا جب کہ ملزمان کو حاضری یقینی بنانے کیلئے 20-20 لاکھ روپے کے ضمانتی مچلکے داخل کرانے کا حکم دیا ہے۔

عدالت نے نوازشریف کو اشتہاری قرار دینے کی کارروائی 25 اگست تک مؤخر کر دی۔ سابق وزیراعظم کو اشتہاری قرار دینے یا ٹرائل میں شامل کرکے فرد جرم عائد کرنے کا فیصلہ 25 اگست کو ہوگا۔