چین میں 8 ماہ بعد کورونا سے ہلاکت، ووہان میں عالمی ماہرین کی آمد
عالمی وبا کورونا وائرس کے پھوٹنے کی تحقیقات کے لیے عالمی ادارہ صحت کے سائنسدانوں کی ٹیم چین کے شہر ووہان پہنچی ہے جبکہ دوسری جانب ملک میں آٹھ ماہ بعد کورونا سے ہلاکت رپورٹ ہوئی ہے۔
بین الاقوامی میڈیا رپورٹس کے مطابق عالمی ادارہ صحت کے ماہرین کی ٹیم جمعرات کو ووہان پہنچی جن کو اپنا کام شروع کرنے سے قبل دو ہفتے تک قرنطینہ میں رہنا ہوگا۔
سائنسدانوں کی ٹیم کے دس ارکان ہیں جو وائرس کے پھوٹنے کے اصل مقام اور وجوہات کا جائزہ لیں گے۔
یاد رہے کہ عالمی وبا کورونا کا پہلا کیس دسمبر 2019 میں چین کے شہر ووہان میں سامنے آیا تھا۔
عالمی ادارہ صحت کے ماہرین ایک ایسے وقت میں چین کے دورے پر ہیں جب ملک کے شمال میں دو کروڑ افراد کو وائرس کے نئے کیسز سامنے آنے پر لاک ڈاؤن میں رکھا گیا ہے۔
