امریکی ریاست کولوراڈو میں فائرنگ سے 10 ہلاک

Reading Time: < 1 minute

امریکی ریاست کولوراڈو میں ایک مسلح شخص نے شاپنگ مال میں فائرنگ کر کے دس افراد کو ہلاک کر دیا ہے۔

وائٹ ہاؤس کی پریس سیکرٹری جین ساکی نے ٹویٹ کیا ہے کہ امریکی صدر جوبائیڈن کو حملے سے متعلق آگاہ کیا گیا ہے۔

پولیس کے مطابق فائرنگ کا یہ واقعہ ریاست کے دارالحکومت ڈینور سے 50 کلومیٹر دور بولڈر کاؤنٹی میں پیش آیا۔

بولڈر کاؤنٹی کے ڈسٹرکٹ اٹارنی مائیکل ڈوگرٹی نے بتایا کہ حملہ آور کو زخمی حالت میں گرفتار کر لیا گیا ہے۔

پولیس چیف مارس ہیرولڈ کے مطابق حملہ آور نے کنگ سوپر مارکیٹ میں شہریوں کو نشانہ بنایا اور مرنے والوں میں مقامی پولیس افسر بھی شامل ہے۔

انہوں نے بتایا کہ حملہ آور کی فائرنگ سے ہلاک ہونے والے 51 سالہ پولیس افسر ایرک ٹیلی سب سے پہلے علاقے میں پہنچے تھے۔

پولیس چیف کے مطابق ’اب تک دس افراد کی ہلاکت کی تصدیق ہوئی ہے جن میں ایک مقامی پولیس افسر شامل ہیں جنہوں نے سب سے پہلے متاثرہ مقام پر پہنچے، ان کو گولیاں لگیں اور وہ جانبر نہ ہوسکے۔‘

براہ راست نشر کی گئی ویڈیوز میں دیکھا گیا کہ پولیس نے درمیانی عمر کے ایک سفید فام شخص کو حراست میں لیا جس نے قیمص نہیں پہنی ہوئی تھی اور وہ خون سے لت پت تھا۔

مقامی پولیس کمانڈر کیری یاماگوچی نے بتایا کہ اس وقت صرف ایک مشتبہ شخص زیر حراست ہے اور وہ شدید زخمی ہے تاہم انہوں نے یہ نہیں بتایا کہ کیا وہی حملہ آور تھا۔