انڈیا میں کورونا کے روزانہ ایک لاکھ کیسز، نیوزی لینڈ کی انڈین مسافروں پر پابندی
Reading Time: < 1 minuteانڈیا میں کورونا وائرس کے کیسز کی تعداد تیزی سے بڑھ رہی ہے اور گزشتہ ہفتے ایک دن میں ایک لاکھ ٹیسٹ مثبت آئے۔
جمعرات کو انڈین محکمہ صحت کے مطابق کورونا کے 1لاکھ 26 ہزار 789 کیسز سامنے آئے ہیں جبکہ گذشتہ 24 گھنٹوں کے دوران 685 ہلاکتیں ہوئی ہیں۔
دوسری جانب نیوزی لینڈ نے کورونا وائرس کے کیسز کی تعداد میں اضافے کے بعد انڈیا سے آنے والے مسافروں کے داخلے پر دو ہفتے تک پابندی لگا دی ہے۔
وزیراعظم جیسنڈا آرڈن نے آکلینڈ میں نیوز کانفرنس کے دوران کہا کہ ’ہم انڈیا سے آنے والے مسافروں کی نیوزی لینڈ میں داخلے پر عارضی پابندی لگا رہے ہیں۔‘
خبر رساں اجنسی روئٹرز کے مطابق یہ اقدام اس وقت سامنے آیا ہے جب جمعرات کو نیوزی لینڈ کی سرحد پر کورونا وائرس کے 23 کیسز رپورٹ ہوئے ہیں جن میں سے 17 انڈیا سے تھے۔
پابندی نہ صرف انڈین مسافروں بلکہ انڈیا سے سفر کرنے والے نیوزی لینڈ کے شہریوں پر بھی عائد ہوگی۔ اس پابندی کا نفاذ 11 اپریل سے 28 اپریل تک ہوگا اور اس دوران حکومت اس پابندی کو ہٹانے کے لیے حفاظتی اقدامات کا جائزہ لے گی۔
جیسنڈا آرڈن نے کہا ہے کہ ’میں یہ واضح کرنا چاہوں گی کہ انڈیا سے کووڈ 19 نیوزی لینڈ پہنچنے کی وجہ سے یہ اقدام اٹھایا گیا ہے۔‘
نیوزی لینڈ نے عملی طور پر اپنی سرحدوں سے کورونا وائرس کا خاتمہ کر دیا ہے اور 40 دنوں سے وائرس کی مقامی سطح پر منتقلی کا کوئی کیس سامنے نہیں آیا۔
انڈیا اس وقت وبا کی دوسری خطرناک لہر سے نبردآما ہے جہاں روزانہ کی بنیاد پر کئی کیسز سامنے آ رہے ہیں۔ گذشتہ دنوں ملک میں اس وائرس کی انتہا دیکھی گئی جب کیسز کی شرح گذشتہ سال ستمبر سے بھی تجاوز کر گئی۔
