عمران خان کی کابینہ میں پھر رد وبدل، شوکت ترین نئے وزیر خزانہ

Reading Time: < 1 minute

پاکستان کے وزیراعظم عمران خان نے ایک بار پھر اپنی کابینہ میں رد و بدل کرتے ہوئے شوکت ترین کو وزیر خزانہ کا قلم دان سونپ دیا ہے۔

جمعے کو وزیراعظم آفس کی جانب سے جاری ہونے والے اعلامیے کے مطابق وفاقی کابینہ میں مجموعی طور پر 6 وزرا کے قلم دان تبدیل کیے گئے ہیں۔

شوکت ترین کو وفاقی وزیر برائے وزارت خزانہ و ریونیو کی ذمہ داری سونپی گئی ہے۔

خیال رہے کہ چند روز قبل حفیظ شیخ کو مہنگائی کو وجہ بنا کر ہٹایا گیا اور وزارت خزانہ کا اضافی قلم دان حماد اظہرکو سونپا گیا تھا۔

حماد اظہر کو اب وزارت توانائی کی ذمہ داریاں دی گئی ہیں جبکہ وفاقی وزیر فواد چوہدری کو ایک بار پھر اطلاعات و نشریات کی وزارت کا قلم دان دے دیا گیا ہے۔

ان کی جگہ سینیٹر شبلی فراز کو سائنس اور ٹیکنالوجی کا وزیر مقرر کیا گیا ہے۔

مخدوم خسرو بختیار کی وزارت بھی تبدیل کر دی گئی ہے۔ انہیں اقتصادی امور کی وزارت سے ہٹا کر صنعت و پیداوار کی وزارت دے دی گئی ہے۔

وفاقی وزیر عمر ایوب خان کو خسرو بختیار کی جگہ اقتصادی امور ڈویژن کا قلم دان سونپ دیا گیا ہے۔ اس سے قبل وہ پاور ڈویژن اور وزارت پیٹرولیم کے وفاقی وزیر تھے۔