کئی جماعتیں اسلام کا غلط استعمال کرکے ملک کو نقصان پہنچاتی ہیں: وزیراعظم

Reading Time: 2 minutes

پاکستان کے وزیراعظم عمران خان نے کہا ہےکہ بدقسمتی سے کئی مرتبہ سیاسی اور  دینی جماعتیں اسلام کو غلط استعمال کرتی ہیں جس سے وہ اپنے ملک کو نقصان پہنچاتی ہیں۔

پیر کو اسلام آباد میں ایک تقریب سے خطاب میں وزیراعظم نے کہا کہ ’بڑی بدقسمتی ہے ملک میں کئی مرتبہ سیاسی  اور دینی جماعتیں اسلام کو غلط استعمال کرتے ہوئے اپنے ملک کو نقصان پہنچاتی ہیں جس سے دوسروں فرق نہیں پڑتا لیکن اپنے لوگوں کو نقصان پہنچتا ہے‘۔

عمران خان نے کہا کہ ’واضح کردوں ہمارے لوگ نبیﷺ سے پیار کرتے ہیں، یہ وہ ملک ہے جو اسلام کے نام پر بنا، میں نے اس طرح کا دین سے لگاؤ اور اپنے نبیﷺ سے عشق کسی ملک میں نہیں دیکھا جو ہمارے ملک میں ہے‘۔

وزیراعظم کا کہنا تھا کہ ’ہم سب کا مقصد ایک ہے لیکن افسوس ہوتا ہے کئی مرتبہ اس پیار کو غلط استعمال کیا جاتا ہے، کیا حکومت کو اس کی فکر نہیں؟ جب ہمارے نبیﷺ کی شان میں گستاخی ہوتی ہے تو کیا ہمیں تکلیف نہیں ہوتی؟ یہ کون فیصلہ کرے گا؟ کیا کسی کے دل کو کسی نے چیر کر دیکھا کہ نبیﷺ سے کون زیادہ پیار کرتا ہے‘۔

انہوں نے مزید کہا کہ ’اس چیز کو جب غلط طریقے سے استعمال کرتے ہیں تو دین کو فائدہ نہیں پہنچا رہے، اس سے جس ملک میں جرم ہورہا ہے ان کو نہیں اپنے ملک کو نقصان پہنچا رہے ہیں‘۔

وزیراعظم نے کہا کہ ’قوم سے وعدہ ہے کہ پاکستان کی تاریخ میں اگر دنیا میں کوئی مہم چلائے گا وہ میں چلاؤں گا اور ہم نے مہم چلانا شروع کردی ہے، مسلمان ملکوں کے سربراہوں کو ساتھ ملا کر پوری طرح اپنا کیس پیش کریں گے، جب ہم مہم چلائیں گے تو اس سے فرق پڑے گا جب جاکر مغرب میں تبدیلی آئے گی،ایک وقت وہ آئیگا کہ مغرب میں لوگوں کو ہمارے نبیﷺ کی شان میں گستاخی کا خوف ہوگا، اس کے لیے مہم کی ضرورت ہے، اپنے ملک میں توڑ پھوڑ کرکے مغرب میں کوئی فرق نہیں پڑرہا ہے، اس طرح ہم اپنا نقصان کررہے ہیں‘۔

ان کا کہنا تھا کہ ’میری مہم سے ہمیشہ کے لیے اس مسئلے کو حل کریں گے تاکہ کوئی باہر بیٹھ کر ہمارے نبیﷺ کی توہین نہ کرے‘۔