کورونا کی تیسری لہر، پاکستان میں ایک دن میں 200 سے زائد اموات

Reading Time: 2 minutes

پاکستان میں کورونا کی تیسری لہر کی شدت برقرار ہے اور پہلی بار 24 گھنٹوں میں وبا سے 201 افراد ہلاک ہو گئے ہیں۔
رواں برس اس مہلک وبا سے  ایک دن میں ہونے والی اموات کی یہ سب سے زیادہ تعداد ہے۔

نیشنل کمانڈ اینڈ کنٹرول سینٹر کی جانب سے بدھ کو جاری اعداد و شمار کے مطابق پاکستان میں گذشتہ 24 گھنٹوں میں 49 ہزار 101 ٹیسٹ کیے گئے جن میں سے پانچ ہزار 292 ٹیسٹ مثبت آئے۔
پاکستان میں منگل سے 40 سال سے زائد عمر کے افراد کی ویکسینیشن کے لیے رجسٹریشن کا عمل شروع ہو چکا ہے۔
پیر کو اپنی ایک ٹویٹ میں این سی او سی کے سربراہ اسد عمر نے بتایا تھا کہ ’آج این سی او سی کے اجلاس میں فیصلہ کیا گیا ہے کہ کل سے 40 سال سے زائد عمر کے افراد کو ویکسین لگانے کے لیے رجسٹریشن ہوگی اس کے علاوہ 50 سال سے زائد عمر کے رجسٹرڈ افرادبھی ویکسینیشن کے لیے آ سکتے ہیں۔‘
انہوں نے لکھا تھا کہ ’اگر آپ 40 سال یا اس سے زائد عمر کے ہیں تو خود کو رجسٹر کرائیں اور دوسروں کو بھی رجسٹر ہونے کا کہیں۔‘
اس سے قبل گذشتہ مہینے 26 مارچ سے 50 سال سے زائد عمر کے پاکستانی شہریوں کے لیے کورونا ویکسین کی رجسٹریشن کا آغاز کیا گیا تھا۔

اس سے قبل ملک میں تین مراحل میں ویکسین لگائی گئی۔ پہلے مرحلے میں ڈاکٹرز اور طبی عملے کو ویکسین لگانے کا آغاز دو فروری کو ہوا۔
دوسرے مرحلے میں 60 سال سے زائد عمر کے بزرگ شہریوں کو کورونا ویکسین لگانا شروع کی گئی، جبکہ تیسرے مرحلے میں 50 سال سے زیادہ عمر کے شہریوں کو ویکسین لگائی گئی۔
پاکستان میں وفاقی حکومت نے تمام شہریوں کو مفت ویکسین فراہم کرنے کا اعلان کیا ہے۔ اس کے علاوہ نجی کمپنیوں کو بھی ویکسین درآمد کرنے کی اجازت دے رکھی ہے۔ ڈرگ ریگولیٹری اتھارٹی آف پاکستان (ڈریپ) نے وفاقی کابینہ کی منظوری سے روسی اور چینی کمپنیوں کی ویکسین کی قیمتیں بھی مقرر کر دی ہیں۔