لگتا ہے فوج سب سے بڑا قبضہ گروپ بن گئی: لاہور ہائیکورٹ

Reading Time: 3 minutes

اوقاف کی زمین پر ایلیٹ فورس کے قبضے کے خلاف کیس کی سماعت کے دوران لاہور ہائیکورٹ کے چیف جسٹس قاسم خان نے کہا ہے کہ درخواست گزار پولیس کی بات کر رہے ہیں یہاں آرمی نے ہائیکورٹ کی 50 کنال اراضی پر قبضہ کیا ہوا ہے۔
بدھ کو چیف جسٹس قاسم خان نے کہا کہ آرمی چیف کو لاہور ہائیکورٹ کے رجسٹرار خط لکھیں گے۔
چیف جسٹس نے کہا کہ میں آج رجسٹرار کو کہتا ہوں آرمی چیف کو لیٹر لکھیں یہ آرمی کیا کر رہی ہے، رجسٹرار میری طرف سے یہ لیٹر لکھے گا۔
چیف جسٹس قاسم خان نے کہا کہ لگتا ہے فوج سب سے بڑا قبضہ گروپ بن گئی ہے، کل کور کمانڈر اور ڈی ایچ اے کے سربراہ کو بلا لیتا ہوں۔
چیف جسٹس قاسم خان کا کہنا تھا کہ یہ معاملہ رسہ گیری کی قسم ہے، فوج کا کام قبضہ گیری ہے؟
چیف جسٹس نے کہا کہ فوج کا کام قبضہ کرنا نہیں، میرے منہ سے فوج سے متعلق جملہ غلط نہیں نکلا، اللہ تعالیٰ نے میرے منہ سچ بلوایا، آرمی کی جانب سے اراضی پر قبضہ کرنا رسہ گیری کی ایک قسم ہے۔

درخواست گزار نے کہا کہ اراضی سے متعلق مخالف فریق کا تعلق آرمی سے ہے اور وہاں سے جواب نہیں آتا۔

چیف جسٹس قاسم خان نے کہا کہ مجھے بطور جج11سال ہوگئے ہیں کسی کی جرات نہیں کہ آج تک مجھے جواب نہ جمع کروائے، مجھے جواب منگوانا آتا ہے اور یہ صرف دو دن کا کام ہے۔

چیف جسٹس قاسم خان نے ڈی ایچ اے کے بریگیڈیئر ستی جو فوری طلب کر لیا۔ چیف جسٹس قاسم خان نے کہا کہ بریگیڈیئر ستی اپنے اسٹار اتار کر آئیں۔ بریگیڈیئر کو یہیں سے جیل بھجواوں گا۔
وقفے کے بعد کیس کی دوبارہ دوبارہ سماعت شروع ہوئی تو ڈی ایچ اے کے وکیل نے بتایا کہ بریگیڈیئر ستی اسلام آباد سپریم کورٹ میں مصروف ہیں۔

چیف جسٹس قاسم خان نے کہا کہ کل میں دوبارہ عدالت لگے گی جتنی کوٹھیاں قبضے کی زمین پر بنی ہیں سب گرانے کا حکم دوں گا، اس بریگیڈیئر کو کہہ دیں کہ صبح ریکارڈ لے کر آجائے۔
چیف جسٹس کا کہنا تھا کہ آرمی والے ملک کے ساتھ کھلواڑ چھوڑ دیں۔
چیف جسٹس نے لاہور کے سی سی پی کو مخاطب کر کے کہا کہ ڈی ایچ اے نے اندھیر نگری مچائی ہوئی اگر ان سے ڈرنا ہے تو نوکری چھوڑ دیں۔
چیف جسٹس نے کہا کہ صرف آرمی کے لوگ اقتدار پر قابض رہے ہیں، اپنی مرضی کے قانون بناتے رہے ہیں اس لیے ان کو کوئی نہیں پوچھتا۔

چیف جسٹس قاسم خان نے ڈی ایچ اے انتظامیہ کی خلاف ہر آنے والی درخواست پر سی سی پی او لاہور کو مقدمہ درج کرنے کا حکم دیا اور کہا کہ ڈی ایچ اے والے پراپرٹی پر قبضہ کرکے بیٹھے ہوئے ہیں۔
چیف جسٹس قاسم خان نے کہا کہ آرمی کی وردی پہننے کا مطلب یہ نہیں کہ یہ لوگوں کی جائیدادوں پر قبضے کریں، جب دل کرتا ہے چار سپاہیوں کو لے جا کر اراضی پر قبضہ کر لیتے ہیں۔
چیف جسٹس نے کہا کہ فوج کے ریٹائرڈ افسران کے لیے زیادہ ویلفیئر ہے پولیس کے لیے کیوں نہیں؟ کیا آرمی کے ساتھ پولیس ،ججز ،وکلا اور دیگر اداروں کی قربانیاں نہیں ہیں۔
چیف جسٹس نے دہرایا کہ آرمی ایسا ادارہ جس نے ہائیکورٹ کی 50کنال کی زمین پر قبضہ کیا ہوا ہے۔ ڈی ایچ اے انتظامیہ کے خلاف رجسٹرار کی مدعیت پر مقدمہ درج کریں جتنے بڑے ہیں قانوں سب کے لیے برابر ہے، وردی والے کرائم کرکے بچ نہیں سکتے چاہے پولیس کی وردی میں ہوں یا فوج کی وردی میں ہوں۔

چیف جسٹس قاسم خان نے کمشنر اور ڈی سی لاہور کو کل طلب کرتے ہوئے کہا کہ میں نے 11سال بطور جج فرائض سر انجام دیے کبھی ڈر کے فیصلہ نہیں کیا، عزت کے لیے یہاں بیٹھا ہوں۔ اس ملک کو تماشا بنا دیا ہے۔

ڈی ایچ اے کے وکیل نے کہا کہ آرڈر کی کاپی مل جائے تو بہتر ہوگا۔ چیف جسٹس نے جواب دیا کہ اس کو آرڈر ہی سمجھیں آپ بچے نہیں ہیں۔