دنیا انٹرنیٹ پر اسلاموفوبیا کے خلاف اقدامات کرے: عمران خان

Reading Time: < 1 minute

پاکستان کے وزیراعظم عمران خان نے عالمی رہنماؤں سے اپیل کی ہے کہ وہ انٹرنیٹ پر نفرت اور انتہا پسندی پھیلانے والوں کے خلاف اقدامات کریں.
عمران خان نے کہا کہ ’کینیڈا کے وزیراعظم کے ساتھ یہ معاملہ اٹھایا ہے، کینیڈین وزیراعظم اسلامو فوبیا سے لڑنے کی اہمیت سمجھتے ہیں، اگر عالمی رہنما فیصلہ کریں ایکشن لینے کا تو یہ مسئلہ حل ہو جائے گا۔‘
سنیچر کو کنیڈین ٹی وی ’سی بی سی نیوز‘ کو انٹرویو دیتے ہوئے عران خان نے کہا کہ ’پاکستان میں ہر کوئی صدمے میں ہے، کیونکہ ہم نے خاندان کی تصویر دیکھی ہے، اور کسی خاندان کو اس طرح ٹارگٹ کرنے سے پاکستانیوں پر گہرا اثر ہوا ہے۔‘
وزیراعظم نے کہا کہ ’اس وقت مسئلہ یہ ہے کہ اس سے نمٹنے کے لیے جذبہ نہیں ہے اور کچھ عالمی رہنما یا مغربی ممالک کی قیادت اس معاملے کو سمجھتے نہیں ہیں۔‘
یاد رہے کہ کینیڈا کے شہر اونٹاریو میں گزشتہ ہفتے ایک حملے میں پاکستانی نژاد چارافراد ہلاک ہوئے تھے جبکہ ایک نو سالہ لڑکا شدید زخمی ہوا تھا۔
پولیس کا کہنا ہے کہ اس خاندان کو اس لیے نشانہ بنایا گیا کیونکہ وہ مسلمان تھے۔ اس خاندان نے 2007 میں پاکستان سے کینیڈا ہجرت کی تھی۔
عمران خان کا انٹرنیٹ پر پھیلائی جانے والی نفرت انگیزی کے بارے میں کہنا تھا کہ ’میں سمجھتا ہوں اس کے خلاف سخت ایکشن لیا جانا چاہیے۔‘
انہوں نے کہا کہ ’جب انٹرنیٹ پر انسانوں کے خلاف ایسی نفرت پھیلانے والی ویب سائٹس موجود ہیں تو عالمی سطح پر اس کے خلاف کارروائی ہونی چاہیے۔‘