ٹیکساس میں دو افراد کی ایک دوسرے پر فائرنگ، 14 راہ گیر زخمی
امریکی ریاست ٹیکساس کے مصروف شہر آسٹن میں دو مسلح افراد کے ایک دوسرے پر فائرنگ کے دوران 14 عام شہری زخمی ہوگئے۔
روئٹرز نیوز ایجنسی کے مطابق آسٹن کے محکمہ پولیس کے چیف جوزیف چیکون نے سنیچر کو نیوز میں بتایا کہ رات ڈیڑھ بجے کے لگ بھگ ریاست کے دارالحکومت کے مصروف علاقے سکستھ سٹریٹ ایریا میں فائرنگ کا واقعہ پیش آیا۔
پولیس چیف کے مطابق ’یہ بظاہر دو فریقین کے درمیان کا آپس کا معاملہ لگتا ہے، واقعے میں زخمی ہونے والے افراد معصوم راہ گیر تھے۔‘
چیکون نے بتایا کہ ’زخمیوں میں سے دو کی حالت تشویشناک ہے جبکہ دیگر 12 کی حالت تسلی بخش ہے۔ واقعے میں کوئی ہلاکت نہیں ہوئی۔‘
آسٹن پولیس ڈیپارٹمنٹ کی جانب سےجاری بیان میں بتایا گیا کہ ملزموں میں سے ایک کو ٹاسک فورس کی مدد سے گرفتار کر لیا گیا ہے جبکہ دوسرے کی گرفتاری کے لیے کوششیں جاری ہیں.
