اوورکوٹ والے پراپرٹی ڈیلرز

Reading Time: 3 minutes

ارے یار، میں نے ابھی اپنے چچا کو 20 لاکھ کا پلاٹ 45 میں بیچا ہے،کیا تم ایسا چونا لگا سکتے ہو ، اس میں کتا بننا پڑتا ہے ، تم شریف آدمی ہو ، یہ حرامیوں کا کھیل ہے۔
اس نے اپنے سیب والے فون کو الٹا رکھتے ہوئے ایک شریف النفس دوست کو مشورہ دیا اور پھر اگلے محاذ پہ نکل پڑا۔

یہ شب و روز پاکستان میں پراپرٹی کے کاروبار سے منسلک 90 فیصد ڈیلرز کے ہیں ، ڈیلرز کی دنیا میں فراڈ اور کامیابی کا چولی دامن کا ساتھ رہا ہے۔
لوگوں سے جمع کیے گئے پیسوں کی ریل پیل ، عوام الناس کی آنکھوں میں دھول کی بجائے تیزاب ڈالنے کے لیے یہ دلچسپ طریقہ واردات اپناتے ہیں، ایمانداری سے زندگی میں یہ صرف آفس کی بناوٹ کرتے ہیں ، مہنگا ترین فون اور لیپ ٹاپ جسے استعمال کرنا تو درکنار اسے ڈھنگ سے پاور آف کرنا بھی ان کی سمجھ سے بالاتر ہے ان کے مہنگے برینڈ کی میز پر نظر آئے گا۔

شکار کو پھنسانے کے لیے 90 فیصد ڈیلرز نے ماڈل طرز کی لڑکیوں کو ریسیپشن اور مختلف جگہوں پر ٹارگٹ سونپے ہوئے ہیں جس کی بجاآوری کے لیے عورت کارڈ استعمال کیا جاتا ہے، ایک بار ان کو آپ کے مالدار ہونے کی بھنک لگ گئی تو روز صبح گڈ مارننگ سے لے کر سونے تک آپ کو یاد رکھا جائے گا، پھر چائے آپ قرضہ لیں یا کچھ اور کریں آپ کو ڈیل ڈن کرنا ہو گی۔

جو پارٹی ان کو تھوڑا مال پانی والی لگے گی اسے گھیرنے کے لیے اسلام آباد کے فائیو سٹار ریسٹورنٹس میں کھانے کھلائے جائیں گے ، کسٹمر کو گھیرنے کے لیے آوڈی ، مرسیڈیز اور کئی قسم کی مہنگی گاڑیاں ان کے دفاتر کے باہر ہمہ وقت دستیاب ہوتی ہیں۔

اس دھندے نما بزنس میں کوئی تعلق یا رشتے کا ایک فیصد بھی کردار نہیں ہوتا ، جہاں پہ ڈنگ لگ گیا فوری لگا دیں گے، جب انہیں کسی قریبی عزیز یا دوست یار کے پاس پیسے آنے کی خبر ہوتی ہے تو فوری طور پر جھپٹیں گے ، منافعے کا جال جسے ہر وقت جیب میں رکھا جاتا ہے اسے فوری طور پر پھینک کر کبڈی کے ماہر کھلاڑی کی طرح ایسے چت کیا جاتا ہے کہ پھر انگ انگ سے کڑ کڑ کی آوازیں نکلتی ہیں۔

پیسوں کی بھر مار ، کروڑوں کی باتیں لیکن بنیادی طور پر کیونکہ یہ کم پڑھے لکھے ہوتے ہیں اس لیے ان کا بحث و مباحثہ ہمیشہ انتہائی سطحی قسم کا ہوتا ہے .

ان تمام عادات کے ساتھ یہ لوگ پیسے کی ہر انسان کی چاہت رکھتے ہیں، تاہم دوسرے لوگوں کے برعکس یہ ہر بات پہ ہمیں لالچ نہیں ہے کے گیت بھی بے سرے تال کے ساتھ گاتے ہیں۔

تمام تر تنقید کے باوجود ان لوگوں پر ترس بھی آتا ہے ، یہ دس لاکھ کی گھڑی ، کروڑ کی گاڑی کے ساتھ سرکس کے شیر کی طرح لوگوں کو تو خوش کرتے رہتے ہیں البتہ ان کی اپنی ذاتی زندگی انتہائی ڈسٹرب ہوتی ہے۔

اپنے کسٹمر کو خوش کرنے کے لئے بے وقت کا کھانا کھانے کے ساتھ ساتھ یہ روبوٹ کی طرح اپنا منہ بھی اس وقت ہلاتے رہیں گے جب تک شکار بھوک مٹا نہیں لیتا، ان میں سے اکثر کی توندیں بے ڈھنگے انداز سے کئی فٹ آگے بڑھ چکی ہیں ، کئی دل اور شوگر کے مریض بن چکے البتہ اس ڈیلر مافیا کی بدولت خیبر شنواری ریسٹورنٹس کا کمال کام چلا ہے۔

جانے کیوں ان کو دیکھ کر غلام عباس کا افسانہ اوور کوٹ یاد آتا ہے جس کا ایک غریب کردار شام کو لمبا اوور کوٹ پہن کر ایلیٹ کلاس کے بابو کی طرح لمبی واک کرتا تھا اور حادثے میں مرنے کے بعد جب اوور کوٹ اتارا گیا تو ہی پتہ چلا اندر لباس مفلسی کے سوا کچھ نہ تھا ۔

یہ پراپرٹی والے مفلس تو ہر گز نہیں لیکن اُس کردار سے کچھ نہ کچھ مماثلت ضرور رکھتے ہیں.