لمز یونیورسٹی کا گریجویٹ اسلام آباد کے ایف نائن پارک میں قتل

لاہور کی لمز یونیورسٹی کے گریجویٹ اور نجی فوڈ ڈیلیوری کمپنی کے بزنس مینیجرکو اسلام آباد کے ایف نائن پارک میں نامعلوم افراد نے ڈکیتی کی واردات کے دوران گولی مار کر قتل کر دیا۔

خاندانی ذرائع کے مطابق 26 سالہ قاسم اعوان والدین کا اکلوتا بیٹا تھا۔

پولیس کے مطابق وقوعہ اتوار کی رات نو بجے کے لگ بھگ پیش آیا جس میں نوجوان زخمی ہو گیا جو تین دن ہسپتال میں زیرعلاج رہا اور بدھ کی شام زندگی کی بازی ہار گیا۔

مقدمے کا اندارج مقتول کے دوست میر شاہان علی کی درخواست پر کیا گیا جن کے مطابق قاسم اعوان نے فون پر بتایا کہ اُس کو گولی لگی ہے اور وہ زخمی ہے۔

میر شاہان علی نے پولیس کو بتایا کہ مقتول قاسم اعوان نے وقوعہ سے قبل بتایا تھا کہ وہ ایف نائن پارک میں جاگنگ کر رہا ہے اور واپسی پر اُن کے ساتھ رات کا کھانا کھائے گا۔

میر شاہان کے مطابق جب اُن کو قاسم اعوان کا فون آیا کہ گولی سے زخمی ہے تو پولیس کو لے کر پارک پہنچا جہاں ایف ٹین گیٹ کے قریب زخمی دوست نے بتایا کہ نامعلوم لڑکوں نے لیٹ جانے کے لیے کہا اور مزاحمت پر گولی ماری جو بازو کو چیرتی ہوئی سینے کے ایک طرف گئی۔

زخمی قاسم اعوان کو پمز ہسپتال منتقل کیا گیا تھا جو تین دن بعد جانبر نہ ہو سکا۔