سعودی سرحدی فورسز کی فائرنگ، سینکڑوں ایتھوپیائی تارکین ہلاک

Reading Time: < 1 minute

انسانی حقوق کی عالمی تنظیم ہیومن رائٹس واچ نے الزام عائد کیا ہے کہ یمن سے آنے والے ایتھوپیائی تارکین وطن پر سعودی فورسز نے فائرنگ کر کے سینکڑوں کو ہلاک کیا ہے۔

ادھر سعودی عرب نے انسانی حقوق کی عالمی تنظیم ہیومن رائٹس واچ کے ان الزامات کو مسترد کر دیا ہے۔

اتوار کو ہیومن رائٹس واچ کی رپورٹ میں کہا گیا تھا کہ سعودی سرحدی فورسز کی جانب سے ایتھوپیائی باشندوں پر اُس وقت فائرنگ کی گئی جب وہ سعودی یمن سرحد عبور کر رہے تھے۔

سعودی حکام نے سنہ 2022 میں اقوام متحدہ کے حکام کی جانب سے لگائے گئے ان الزامات کی بھی سختی سے تردید کی ہے کہ سرحدی فورسز نے گذشتہ سال تارکین وطن کو منظّم طریقے سے ہلاک کیا۔

ہیومن رائٹس واچ نے اپنی رپورٹ میں سعودی سرحدی فورسز پر الزام عائد کیا ہے کہ انہوں نے یمن سے مملکت میں داخل ہونے کی کوشش کرنے والے تارکین وطن جن میں سے زیادہ تر ایتھوپیائی باشندے تھے، کو مارنے کے لیے فائرنگ کی اور دھماکہ خیز مواد استعمال کیا۔