جج پر تعصب کا الزام، انجم عقیل کو توہینِ عدالت کا نوٹس
اسلام آباد کے تین حلقوں کے انتخابی نتائج پر تنازعات کو دیکھنے کے لیے بنائے گئے ٹریبونلز کی نوٹیفیکیشن کو دیکھتے ہوئے ہائیکورٹ نے مسلم لیگ ن کے رُکنِ قومی اسمبلی انجم عقیل کو توہین عدالت کا نوٹس جاری کیا ہے۔
پیر کو مقدمے کی سماعت کے دوران چیف جسٹس نے پوچھا کہ الیکشن کمیشن اور وہاں پر درخواست گزار بتائے جج صاحب کیسے جانبدار تھے؟
اسلام آباد ہائیکورٹ نے قرار دیا کہ انجم عقیل خان الیکشن کمیشن میں دی گئی درخواست میں الیکشن ٹریبونل جج سے متعلق الفاظ کے استعمال کی وضاحت نہیں کر سکے، توہین عدالت کا شوکاز نوٹس جاری کیا جاتا ہے۔
الیکشن ٹریبونل کی تبدیلی کے لیے الیکشن کمیشن میں دی گئی درخواست میں ٹریبونل جج جسٹس طارق محمود جہانگیری سے متعلق توہین آمیز الفاظ اور جانبداری کے الزامات عائد کرنے پر مسلم لیگ ن کے رکن قومی اسمبلی انجم عقیل خان نے اسلام آباد ہائی کورٹ میں معافی مانگ لی۔
انجم عقیل خان سے جب چیف جسٹس نے پوچھا کہ آپ نے درخواست میں جو الزمات لگائے وہ اب ثابت کریں، جج نے الیکشن پٹیشن سنتے وقت کیا تعصب برتا یا جانبداری دکھائی، تو انجم عقیل خان نے کہا یہ قانونی زبان ہے، انہوں نے پڑھے بغیر دستخط کیے تھے۔
عدالت نے وضاحت مسترد کرتے ہوئے توہین عدالت کا شوکاز نوٹس جاری کر دیا۔
