حکومت کی آئینی ترمیم کا مسودہ مکمل مسترد کر دیا: مولانا فضل الرحمان
جمعیت علمائے اسلام پاکستان کے سربراہ مولنا فضل الرحمان نے کہا ہے کہ اُن کی جماعت نے حکومت کی آئینی ترمیم کا مسودہ مکمل طور پر مستردکر دیا ہے۔
بدھ کی سہ پہر اسلام آباد میں تحریک انصاف کے رہنماؤں کی جانب سے دیے گئے ظہرانے کے بعد میڈیا سے گفتگو میں مولانا فضل الرحمان کا کہنا تھا کہ ہم نے حکومت کے آئینی ترمیمی بِل کا مسودہ مکمل مسترد کر دیا ہے۔
مولانا فضل الرحمن کا کہنا تھا کہ اب حکومت کہہ رہی ہے ہمارا کوئی مسودہ ہے ہی نہیں، مسودہ کسی کو دیا گیا اور کسی کو نہیں۔ اور اگر کوئی مسودہ تھا ہی نہیں تو جو مہیا کیا گیا وہ کیا تھا؟
انہوں نے کہا کہ جو کچھ بھی ہمارے حوالے کیا گیا ہم نے اس کا مطالعہ کیا، اور ہم نے بتا دیا کہ یہ مسودہ کسی صورت قابل قبول نہیں اور نہ ہی قابلِ عمل ہے۔
صحافی نے مولانا فضل الرحمن سے سوال
کیا کہ پورے پاکستان میں آپ کے کردار کی باتیں ہو رہی ہیں، کیا یہ کردار آئندہ بھی ایسا ہی رہے گا؟
انہوں نے جواب دیا کہ اگر ہم اس مسودے پر حکومت کا ساتھ دیتے تو ملک اور قوم کی امانت میں اس سے بڑی خیانت کوئی نہ ہوتی۔
