ایرانی حملے کے بعد سالانہ 20 ارب ڈالر کا نقصان ہو گا: قطر
خلیجی ملک قطر نے کہا ہے کہ راس لفان کے صنعتی علاقے پر ایران کے حملے سے ایل این جی کی برآمدی صلاحیت اگلے پانچ برسوں میں 17 فیصد کم ہو گی اور سالانہ 20 ارب ڈالر کا نقصان ہو گا۔
قطر کے وزیرِ توانائی نے کہا ہے کہ راس لفان تنصیب پر حملے کے نتیجے میں قطر کی مائع قدرتی گیس (ایل این جی) کی برآمدی صلاحیت اگلے پانچ سالوں میں 17 فیصد کم ہو جائے گی، جس سے ملک کو سالانہ آمدنی میں 20 ارب ڈالر کا نقصان ہو گا۔
صنعتی پروسیسنگ یونٹ ٹرین کا استعمال کرتے ہوئے قدرتی گیس کو بہت کم درجہ حرارت پر ٹھنڈا کر کے ایل این جی تیار کی جاتی ہے۔ قطری وزیر کا کہنا ہے کہ ایرانی حملوں سے پلانٹ کی 14 ٹرینوں میں سے دو کو نقصان پہنچا ہے۔
ایران کے مطابق اس راس لفان پر حملہ بدھ کو اس کے جنوبی پارس گیس فیلڈ پر اسرائیلی حملے کا جواب تھا۔
