نیاگرا فال کینیڈا میں پولیس فائرنگ سے شہری کی ہلاکت، پولیس افسر پر قتل خطا کا مقدمہ

نورالامین دانش، کینیڈا

اونٹاریو میں پولیس احتساب سے متعلق ایک اہم پیش رفت سامنے آئی ہے جہاں Toronto Police Service کے ایک اہلکار پر نیاگرا فالز میں پیش آنے والے مہلک فائرنگ واقعے کے سلسلے میں قتلِ خطا کا الزام عائد کیا گیا ہے۔

یہ واقعہ 30 جولائی 2025 کو پیش آیا تھا جب پولیس کی خصوصی ٹیم Repeat Offender Parole Enforcement (ROPE) ایک مطلوب شخص کو گرفتار کرنے کے لیے ایک ہوٹل کے باہر موجود تھی۔

اطلاعات کے مطابق جیسے ہی مشتبہ شخص باہر آیا، اسے حراست میں لینے کی کوشش کی گئی مگر صورتحال اچانک کشیدہ ہو گئی اور تصادم کی کیفیت پیدا ہو گئی، جس دوران ایک پولیس اہلکار کی جانب سے فائرنگ کی گئی۔

فائرنگ کے نتیجے میں 40 سالہ شخص شدید زخمی ہوا جسے فوری طور پر اسپتال منتقل کیا گیا تاہم وہ جانبر نہ ہو سکا اور دم توڑ گیا۔ اس واقعے کی تحقیقات Special Investigations Unit (SIU) نے کیں، جس کے بعد دستیاب شواہد کی بنیاد پر کانسٹیبل اینڈریو لاسن کے خلاف قتلِ خطا کا مقدمہ درج کر لیا گیا۔

ایس آئی یو کے مطابق شواہد اس بات کی نشاندہی کرتے ہیں کہ کارروائی کے دوران ممکنہ طور پر مجرمانہ غفلت برتی گئی، جس کی بنیاد پر یہ الزام عائد کیا گیا۔ واقعے کے بعد متعلقہ اہلکار کو معطل کر دیا گیا ہے تاہم صوبائی قانون کے تحت انہیں تنخواہ کے ساتھ معطلی دی گئی ہے۔

دوسری جانب Toronto Police Association کے صدر کلیٹن کیمبل نے اس پیش رفت کو افسوسناک قرار دیتے ہوئے کہا کہ واقعہ ایک غیرمتوقع اور خطرناک صورتحال میں پیش آیا جہاں ایک اور پولیس اہلکار بھی زخمی ہوا، اور ایسے حالات میں کیے گئے فیصلوں کو مکمل تناظر میں دیکھا جانا چاہیے۔ انہوں نے اس بات پر زور دیا کہ متعلقہ افسر کو بھی مکمل قانونی حق اور منصفانہ سماعت ملنی چاہیے۔

ملزم اہلکار کی عدالت میں پیشی مئی 2026 میں متوقع ہے جبکہ معاملہ اب عدالتی مرحلے میں داخل ہو چکا ہے، اس لیے Special Investigations Unit نے مزید تفصیلات جاری کرنے سے گریز کیا ہے۔
یہ کیس نہ صرف ایک فرد بلکہ پورے پولیس نظام کی شفافیت، جوابدہی اور عوامی اعتماد کے لیے ایک اہم امتحان بن چکا ہے۔