’آئی ایم بیک‘، کرسٹیانو رونالڈو چھ ورلڈ کپ میں گول سکور کرنے والے پہلے کھلاڑی
پرتگال کے کرسٹیانو رونالڈو اور ارجنٹینا کے لیونل میسی، دونوں نے سنہ 2006 سے ہر ورلڈ کپ میں شرکت کی ہے۔
میسی نے 18 گول سکور کیے ہیں جبکہ رونالڈو ورلڈ کپ کے میچوں میں اب تک 10 گول کر سکے ہیں لیکن ارجنٹینا کے سٹار فارورڈ نے سنہ 2010 کے ٹورنامنٹ میں کوئی گول نہیں کیا تھا۔
دو دن قبل لیونل میسی 39 سال کے ہو گئے ہیں جبکہ رونالڈو ورلڈ کپ کی تاریخ میں 41 برس کی عمر میں گول کرنے والے دوسرے کھلاڑی بن گئے ہیں۔
رونالڈو سے پہلے صرف کیمرون کے راجر میلا ایسے کھلاڑی ہیں، جنھوں نے سنہ 1994 میں روس کے خلاف 42 سال کی عمر میں گول سکور کیا تھا۔
پرتگال کی ازبکستان کے خلاف پانچ صفر کی جیت میں دو گول کرنے کے بعد کرسٹیانو رونالڈو نے ٹیلی ویژن کیمرے کی طرف دیکھ کر ان ناقدین کو سخت پیغام دیا، جنھوں نے کہا تھا کہ رونالڈو سنہ 2026 کے ورلڈ کپ میں پرتگال کے لیے ایک مسئلہ ہیں۔
یکے بعد دیگرے دو گول کرنے کے بعد 41 سالہ رونالڈو اپنے جذبات کو چھپا نہ سکے اور نہ ہی اپنی خوشی کو قابو میں رکھ پائے کیونکہ انھوں نے ایک تاریخی کارنامہ انجام دیتے ہوئے فٹبال کے سب سے بڑے ٹورنامنٹ کے چھ مختلف ایڈیشنز میں گول کرنے والے پہلے کھلاڑی ہونے کا اعزاز بھی اپنے نام کر لیا۔
یہ اُن کے ناقدین کے لیے بہترین جواب بھی تھا۔
گروپ K کے ابتدائی میچ میں پرتگال اور جمہوریہ کانگو کے درمیان میچ 1-1 سے برابر رہا تھا اور رونالڈو کو شدید تنقید کا سامنا کرنا پڑا تھا کیونکہ دیگر عالمی ستارے جیسے ارجنٹائن کے میسی، فرانس کے امباپے اور ناروے کے ایرلنگ ہالینڈ اس ٹورنامنٹ کے پہلے دو ہفتوں میں متاثر کن کارکردگی دکھاتے ہوئے کئی ریکارڈ اپنے نام کر چکے ہیں۔
