بلوچستان میں کورونا وائرس کا خوف

پاکستان کے صوبہ بلوچستان کے شہریوں میں ایمرجنسی کے نفاذ کے بعد تیزی سے یہ خوف پھیل رہا ہے کہ کورونا وائرس بہت جلد ان کے علاقوں میں منتقل ہوسکتا ہے۔

بین الاقوامی ذرائع ابلاغ کے مطابق بلوچستان سے ملحق ایران کے سرحدی شہر زاہدان میں بھی کورونا کیس رپورٹ ہونے کی اطلاعات ہیں۔

واضح رہے کہ چین سے پھیلنے والے وائرس سے گزشتہ ہفتے ایران میں تین ہلاکتیں ہوئی ہیں جس کے بعد پاکستان نے ایران کے ساتھ سرحد پر سخت اقدامات کیے ہیں اور زیارات کے لیے پڑوسی ملک جانے والے شیعہ مسلمانوں کو روک کر بلوچستان میں ہنگامی حالت نافذ کی ہے۔

مقامی ذرائع ابلاغ کے مطابق ایرانی سرحد سے متصل پاکستانی علاقوں کے مکینوں میں خوف و ہراس تیزی سے پھیل رہا ہے اور بے یقینی کی فضا پیدا ہو رہی ہے۔

خیال رہے کہ ایران سے روزانہ ہزاروں گاڑیوں ڈیزل اور پٹرول لے کر غیرقانونی طور پر بلوچستان میں داخل ہوتی ہیں۔