پشاور کے ہسپتال میں آکسیجن سیلنڈر ختم، ہلاکتوں کی انکوائری کا حکم
پاکستان کے صوبہ خیبر پختونخوا کے دارالحکومت پشاور کے ہسپتال میں زیرعلاج کورونا کے چھ مریض آکسیجن سیلنڈر ختم ہونے سے انتقال کر گئے ہیں۔
صوبے کے وزیراعلیٰ نے واقعہ کا نوٹس لے کر تحقیقات کا حکم دیتے ہوئے 48 گھنٹوں میں رپورٹ طلب کی ہے۔
اتوار کو مقامی میڈیا کی رپورٹس کے مطابق خیبر ٹیچنگ ہسپتال کو راولپنڈی سے آکسیجن سیلنڈروں کی کھیپ بروقت نہ پہنچ سکی جس سے یہ واقعہ پیش آیا۔
1. There was an incident at KTH last night involving a shortage of oxygen supply.
I have directed the BoG to conduct an immediate inquiry & take action within 48 hours. If found unsatisfactory, or if otherwise required, the govt will immediately order its own independent inquiry.— Taimur Khan Jhagra (@Jhagra) December 6, 2020
صوبائی وزیر صحت تیمور جھگڑا نے واقعہ کے حوالے سے پریس کانفرنس کرتے ہوئے بتایا کہ دو دن میں انکوائری مکمل کر کے رپورٹ پیش کرنے کی ہدایت کی گئی ہے۔
تیمور جھگڑا کا کہنا تھا کہ سنیچر کی رات خیبر ٹیچنگ ہسپتال میں آکسیجن کی سپلائی ختم ہونے پر مریضوں کو ہنگامی طور پر ریسکیو سروس کے ذریعے دیگر ہسپتالوں میں منتقل کیا گیا تاہم اس کے باوجود چھ انسانی جانیں ضائع ہوئیں۔
انہوں نے کہا کہ ’صوبائی حکومت عوام کو یقین دلاتی ہے کہ واقعہ کی شفاف انکوائری ہوگی اور حقائق شفاف طریقے سے سامنے لائے جائیں گے۔‘
پاکستان میں سوشل میڈیا پر اس خبر کے بعد شدید ردعمل دیکھا جا رہا ہے اور صارفین نے اس کو قتل عام قرار دیا ہے۔
