نور مقدم قتل کیس میں کوئی ملزم باہر نہیں جا سکتا: وزیر داخلہ

پاکستان کے وزیر داخلہ شیخ رشید نے کہا ہے کہ اسلام آباد میں قتل کی گئی سابق سفارتکار کی بیٹی نور مقدم کیس کے تمام ملزموں کے نام ای سی ایل میں ڈال دیے گئے ہیں۔

منگل کو پریس کانفرنس میں وزیر داخلہ نے کہا کہ کہا کہ ’بائیومیٹرک سسٹم سے پہلے جو ستر لاکھ شناختی کارڈ جاری ہوئے ہیں، ان سب کی تجدید کی جائے گی۔ تمام جعلی شناختی کارڈز کو ختم کر رہے ہیں اور جن افسروں نے اس عمل میں مدد کی ان سب کو نادرا سے نکال رہے ہیں۔‘

خیال رہے پیر کو ڈی آئی جی آپریشنز اسلام آباد پولیس افضال کوثر نے سینیٹ کی قائمہ کمیٹی کو بتایا تھا کہ نور مقدم کیس کا چالان بہت جلد پیش کر دیا جائے گا۔

ڈی آئی جی آپریشنز نے کمیٹی کو بتایا کہ ’ہماری کوشش ہے کہ جلد از جلد بلکہ 20 جولائی تک چالان مکمل کرکے عدالت میں پیش کریں۔‘