ملک ریاض کی آڈیو لیک، خان کی زرداری سے ڈیل کی اپیل؟
پاکستان میں سوشل میڈیا پر لیک کی گئی ایک سیاسی گفتگو کی آڈیو اب ٹی وی چینلز بھی نشر کر رہے ہیں جس میں مبینہ طور پر ملک کے معروف پراپرٹی ڈیلر ملک ریاض کو سابق صدر آصف زرداری سے بات کرتے سنا جا سکتا ہے۔
سنیچر کی شام سوشل پر لیک کی گئی آڈیو کال میں
ملک ریاض سے منسوب آواز میں کہا جا رہا ہے کہ ’خان آپ سے مصالحت چاہتے ہیں۔‘ جواب میں ’آصف زرداری کی آواز‘ میں کہا جاتا ہے کہ ’اب یہ ممکن نہیں۔‘
پی ٹی آئی کے حامی صارفین نے آڈیو ٹیپ پر تبصروں میں کہا کہ اب وقت بدل چکا ہے اس طرح کی کوششوں سے ان کا اپنی قیادت پر اعتماد ختم نہیں کیا جا سکتا۔
تاہم ہزاروں افراد نے اس آڈیو پر دلچسپ تبصرے بھی کیے اور حکومت سے عمران خان کی مشکلات کا ذکر کیا۔
آصف علی زرداری، پیپلزپارٹی یا ملک ریاض کی جانب سے اس آڈیو ٹیپ پر کچھ نہیں کہا گیا، تاہم عمران خان کے چیف آف سٹاف شہباز گل نے ٹویٹ میں اسے ’جھوٹی خبر‘ قرار دیتے ہوئے کہا ’عمران خان کو کسی این آر او کی ضرورت نہیں بلکہ تمام لوگ خان سے این آر او مانگتے رہے ہیں۔‘
