کوہلی کی مایوس کن کارکردگی، ’وقت تیزی سے ختم ہو رہا ہے‘
انڈین کرکٹ ٹیم کے سٹار بلے باز وراٹ کوہلی انگلینڈ کے خلاف جاری سیریز کے آخری ٹیسٹ میچ کی پہلی اننگز میں بھی مایوس کن کارکردگی دکھا کر جلدی آوٹ ہو گئے۔
جمعے کو برمنگھم میں ٹیسٹ میچ کے پہلے دن جہاں انڈین بیٹنگ لائن مشکل میں پڑ گئی وہیں سٹار کھلاڑی وراٹ کوہلی کی بری فارم بھی ٹھیک نہ ہو سکی۔
وراٹ کوہلی صرف 11 رنز بنا کر اولے پوپس کی گیند پر بولڈ ہو گئے۔
انڈین ٹیم کے کپتان روہت شرما کی عدم شمولیت کے باعث انڈین ٹیم وراٹ کوہلی کی بیٹنگ پر کافی انحصار کر رہی تھی تاہم وہ ایک بار پھر ناکام رہے۔
وراٹ کوہلی کے جلدی آوٹ ہونے پر سماجی رابطوں کی ویب سائٹ ٹوئٹر پر بھی تبصرے دیکھنے میں آئے۔
کے آر نٹراجن نامی ایک صارف اپنے ٹویٹ میں کہا ’وراٹ کوہلی کی ایک اور ناکامی، اب کوہلی کی ٹیم میں شمولیت پر سوال اٹھ رہا ہے۔
ان کا کہنا تھا کہ پُجارا اور رہانے کے لیے ایک اور وراٹ کوہلی کے لیے دوسرا معیار نہیں رکھ سکتے حالانکہ کوہلی عظیم کھلاڑی رہ چکے ہیں، وقت تیزی سے ختم ہو رہا ہے۔‘
اکشت نامی ایک صارف نے ٹویٹ کیا ’زندگی اب صرف یہی رہ گئی ہے کہ وراٹ کوہلی کو کھیلتے دیکھتا ہوں اور اس کے آؤٹ ہونے کے بعد ٹی وی بند کر دیتا ہوں۔‘
