پنجاب میں 100 یونٹ بجلی مفت فراہم کرنے کا اعلان

Reading Time: 2 minutes

پاکستان کے صوبے پنجاب کے وزیراعلٰی حمزہ شہباز نے پنجاب میں 100 یونٹس تک بجلی اور پورے صوبے میں لوگوں کو سولر پینل بھی مفت فراہم کرنے کا اعلان کیا ہے۔

پیر کو لاہور میں صحافیوں سے گفتگو کرتے ہوئے حمزہ شہباز کا مزید کہنا تھا کہ ’مفت بجلی کا فیصلہ اسی ماہ سے نافذالعمل ہو گا اور اگست میں آنے بلوں میں 100 یونٹ مفت ہوں گے۔‘

انہوں نے بتایا کہ ایک منصوبہ بنایا گیا ہے جس کے تحت لوگوں کو سولر پینل دیے جائیں گے تاکہ آنے والے برسوں میں ان کی بجلی ہمیشہ کے لیے مفت ہو جائے۔

انہوں نے یہ بھی یاد دلایا کہ جس طرح آتے ہی ادویات اور آٹے میں کمی کی تھی، اسی طرح اب بجلی میں بھی ریلیف دیا گیا ہے۔

حمزہ شہباز یہ وضاحت بھی کی کہ وہ یہ اقدامات سیاست کی غرض سے نہیں کر رہے بلکہ ان کا مقصد یہ ہے کہ غریبوں کو احساس ہو کہ کوئی ان کا احساس کرنے والا بھی موجود ہے۔

ان کا کہنا تھا کہ سابق وزیراعظم عمران خان کے بیان کا حوالہ دیتے ہوئے کہا کہ ’میں ان کی طرح یہ نہیں کہوں گا کہ میں آلو ٹماٹر کی قیمتیں کم کرنے نہیں آیا۔اگر لوگوں کے چولہے ٹھنڈے پڑے ہوں گے تو مجھے یہاں (عہدے) پر بیٹھنے کا کوئی حق نہیں۔

وزیراعلی نے کہا کہ ہمارے سامنے دو راستے تھے سیاست بچاتے یا ریاست، اور ہم نے ریاست کو بچانے کا فیصلہ کیا۔
’74 سال بعد بھی ملک دوراہے پر کھڑا ہے، ہمیں سسکتی معشیت کو دوبارہ زندہ کرنا ہے۔

وزیراعلٰی کا کہنا تھا کہ 2018 میں مسلم لیگ ن صفر لوڈشیڈنگ چھوڑ کر گئی تھی، مگر پچھلی حکومت پنجاب کے ساتھ کھیلتی رہی۔

ان کا کہنا تھا کہ ہم نے گندم پر 200 ارب کی سبسڈی دی اور دس کلو آٹے کے تھیلے پر 160 روپے کا ریلیف دیا۔