سابق امریکی صدر ٹرمپ کے گھر چھاپہ،ٹاپ سیکرٹ دستاویزات برآمد

Reading Time: < 1 minute

امریکہ کے تحقیقاتی ادارے ایف بی آئی نے سابق صدر ڈونلڈ ٹرمپ کے گھر کی تلاشی کے دوران 11 اہم دستاویزت کی فائلیں برآمد کی ہیں جن میں سے کچھ پر ’ٹاپ سیکرٹ‘ لکھا ہوا تھا۔

غیر ملکی خبر رساں ایجنسی روئٹرز کے مطابق امریکی محکمہ انصاف نے کہا ہے کہ سابق صدر کے گھر کی تلاشی کی وجہ جاسوسی کے قانون کی خلاف ورزی تھی۔

یہ انکشاف ایف بی آئی کے چھاپے کے چار دن بعد کیا گیا ہے جس کے لیے امریکی مجسٹریٹ جج نے سرچ وارنٹ جاری کیا تھا۔

سابق صدر کے گھر پر چھاپے اور تلاشی کے لیے جاری کیے گئے وارنٹ میں جاسوسی کے قانون کا حوالہ دیا گیا تھا جس کے مطابق ایسی معلومات کو عام کرنا جرم ہے جو قومی سلامتی کو نقصان پہنچانے کا باعث ہوں۔

دوسری جانب ڈونلڈ ٹرمپ نے اپنے سوشل میڈیا پلیٹ فارم پر جاری کیے گئے بیان میں کہا ہے کہ ’تمام ریکارڈ ڈی کلاسیفائیڈ‘ یعنی پہلے ہی عام کیا جا چکا تھا اور اس کو ’محفوظ جگہ‘ پر رکھا گیا تھا۔

ری پبلکن پارٹی سے تعلق رکھنے والے سابق صدر نے کہا کہ ’ان کو گھر پر چھاپہ مارنے اور سیاست کرنے کی ضرورت نہیں تھی بلکہ جس وقت چاہتے لے جاتے۔ ان کو کچھ بھی قبضے میں لینے کی ضرورت نہیں تھی۔‘

یہ تلاشی اُن تحقیقات کا حصہ تھی جس میں یہ معلوم کرنا ہے کہ آیا ٹرمپ نے اپنا عہدہ چھوڑتے وقت دستاویزات کو غیر قانونی طور پر ہٹا دیا تھا۔قبل ازیں محکمہ انصاف نے بتایا تھا کہ ان میں سے کچھ کلاسیفائیڈ دستاویزات ہیں جو خفیہ رکھی جاتی ہیں۔